స్టైలిష్ స్టార్ అల్లు అర్జున్ హీరోగా స్టార్ డైరెక్టర్ త్రివిక్రమ్‌ శ్రీనివాస్‌ రూపొందించిన చిత్రం ‘అల వైకుంఠపురంలో..’. గతేడాది సంక్రాంతికి విడుదలైన ఈ సినిమా ఇంకా రికార్డుల పరంపర కొనసాగిస్తూనే ఉంది. సినిమాతో పాటు పాటలు కూడా పాపులర్ అవడంతో ఈ సినిమా ఇప్పటికీ టాక్ ఆఫ్ ది టౌన్‌గానే ఉంది. కథ పాతదే అయినా కూడా దానిని ప్రేక్షకులకు అందించిన తీరు అద్భుతంగా ఉండటంతో ఈ సినిమా బ్లాక్ బస్టర్ హిట్ అయింది. బాక్సాఫీస్ వద్ద ఈ సినిమా కాసుల వర్షం కురిపించింది.

ఈ సినిమాలోని పాటలు, వాటికి బన్నీ స్టెప్పులు ప్రేక్షకులను అమితంగా ఆకట్టుకున్నాయి. ఈ సినిమాలోని పాటలు, బన్నీ స్టెప్స్ తెలుగు ప్రేక్షకులనే కాదు దేశవ్యాప్తంగా అందరినీ అలరించాయి. దీంతో ఇప్పటికీ ఈ సినిమా పాటలు రికార్డులు కొల్లగొడతూనే ఉన్నాయి. ఈ సినిమాలోని `రాములో.. రాముల..` పాట తాజాగా అరుదైన ఘనతను సొంతం చేసుకుంది. ఈ పాట పూర్తి వీడియో ఇప్పటి వరకూ 300 మిలియన్లకు పైగా వ్యూస్‌ సాధించి సంచలన రికార్డు నెలకొల్పింది. దక్షిణాదిలో ఈ ఘనత సాధించిన తొలి పాటగా ‘రాములో రాముల’ నిలిచింది.