మాట మీద నిలబడే వ్య‌క్తి .. తమన్: బన్నీ
- IndiaGlitz, [Saturday,April 11 2020]
బన్నీ ఆనందానికి అవ‌ధులు లేవు. ఎప్ప‌టి నుండో ఎదురు చూసిన సాలిడ్ హిట్‌ను ఈ ఏడాది అల వైకుంఠ‌పుర‌ములో చిత్రంతో సాధించేశాడు. బన్నీ, త్రివిక్ర‌మ్ కాంబినేషన్లో రూపొందిన ఈ సినిమాపై ఉన్న అంచ‌నాల‌ను పెంచింది మాత్రం పాట‌లే. తమన్ సంగీత సార‌థ్యంలో విడుద‌లైన ప్ర‌తిపాట మ్యూజిక్ ప్రియుల‌ను అల‌రించాయి. సామ‌జ‌వ‌ర‌గ‌మ‌న, రాములో రాముల, బుట్ట‌బొమ్మ సాంగ్స్ అన్నీ వంద మిలియ‌న్ వ్యూస్‌ను సాధించాయి. సినిమాకు అంత మంచి మ్యూజిక్ అందించిన త‌మ‌న్‌కు బన్నీ స్పెష‌ల్ థాంక్స్ చెప్పాడు. ఈ సినిమా ఆల్బమ్ 1.13 బిలియన్ వ్యూస్‌ను సాధించింది. దీనిపై బన్నీ స్పందిస్తూ ‘‘తమన్ నిన్ను చూసి గర్వపడుతున్నాను. ఎందుకంటే నీ మాట‌ను నువ్వు నిల‌బెట్టుకున్నావు. సినిమా ప్రారంభానికి ముందు ‘ఒక బిలియన్ వ్యూస్ ఉండేలా నాకు ఆల్బమ్ చేయాలి’ అని చెబితే నువ్వు ‘సరే బ్రదర్.. ప్రామిస్ చేస్తున్నా’ అన్ని అన్నావు. ఈరోజు ఆల్బమ్‌ను 1.13 బిలియన్ మంది చూశారు. మాట మీద నిలబడే వ్యక్తివి నువ్వు.. ధన్యవాదాలు’’ అని బన్నీ ట్వీట్ చేశారు.
ఈ ట్వీట్‌కు తమన్ స్పందిస్తూ ‘‘ఈ ఆల్బమ్ ఇంత పెద్ద హిట్ట‌య్యిందంటే నువ్వు, మ‌న ప్రియ‌మైన ద‌ర్శ‌కుడు త్రివిక్ర‌మే కార‌ణం. ఈ సినిమా ప్ర‌యాణం నా హృద‌యానికి ద‌గ్గ‌రైంది. మీరు నామీద చూపించిన ప్రేమ, న‌మ్మ‌కం వ‌ల్ల‌నే ఇది సాధ్య‌మైంది. అందువ‌ల్లే 100 శాతం మంచి సంగీతాన్ని అందించాను. ఈ ట్వీట్‌ను జీవితాంతం దాచి పెట్టుకుంటాను’’ అన్నారు తమన్.