స్టైలిష్ స్టార్ అల్లు అర్జున్‌కు తెలుగులోనే కాదు మలయాళంలో కూడా అభిమానులు ఉన్నారు. అందుకే బన్నీ సినిమాలు మలయాళంలో కూడా అనువదింపబడుతూ ఉంటాయి. ప్ర‌స్తుతం ఆయ‌న న‌టిస్తున్న చిత్రం 'నా పేరు సూర్య నా ఇల్లు ఇండియా' కూడా మలయాళంలో డబ్ కానుంది. తెలుగుతో పాటు మలయాళంలో కూడా విడుదల కానున్న ఈ సినిమా మలయాళం వెర్షన్ టీజ‌ర్‌ను (ఫ‌స్ట్ ఇంపాక్ట్‌) బుధ‌వారం (ఫిబ్ర‌వ‌రి 7) సాయంత్రం గం.4.30ని.లకు విడుదల చేయబోతున్నట్లు బన్నీ ట్విట్టర్ ఖాతా ద్వారా తెలియ‌జేశారు.

అలాగే ఈ సినిమా పేరుని 'ఎంటే పేరు సూర్య ఎంటే వీడు ఇండియా' అని కూడా ఖరారు చేశారు. ఆర్మీ నేపథ్యంలో సాగే ఈ కథలో బన్నీ సైనికుడిగా నటిస్తున్న సంగతి తెలిసిందే.

ప్రస్తుతం కాశ్మీర్ లో షూటింగ్ జరుపుకుంటున్న ఈ చిత్రం కోసం -12 డిగ్రీల ఉష్ణోగ్రతలో బన్నీ నిజమైన సైనికుడిలా కష్టపడుతున్నారని చిత్ర యూనిట్ వెల్ల‌డించింది. అను ఇమ్మాన్యుయేల్ కథానాయికగా నటిస్తున్న ఈ మూవీలో సీనియర్ నటులు అర్జున్, శరత్ కుమార్ కీలక పాత్రలు పోషిస్తున్నారు. వక్కంతం వంశీ ద‌ర్శ‌క‌త్వం వ‌హిస్తున్న ఈ చిత్రం ఏప్రిల్ 27న విడుద‌ల కానుంది.