అల్లు అరవింద్.. తెలుగు రాష్ట్రాల్లో ఈ పేరు తెలియని వారుండరు. నిర్మాతగా ఎన్నో విజయవంతమైన సినిమాలను ఆయన తెరకెక్కించారు. అంతేకాదు.. ఏ వ్యాపారం మొదలుపెట్టినా అందులో నెంబర్ వన్ కావడం ఆయన మేధస్సుకు, కృషి, పట్టుదలకు నిదర్శనం. కేవలం సినిమాలే కాకుండా ఎన్నో వ్యవహారాలను అల్లు అరవింద్ చక్కబెడుతున్నారు. ఇండస్ట్రీతో పాటు మెగా ఫ్యామిలీకి పెద్ద దిక్కుగా వున్నారు. అయితే అల్లు అరవింద్ పైకి కనిపించేంత సాఫ్ట్ కాదట. కాలేజ్ రోజుల్లో కానీ.. ఇప్పుడు కానీ ఆయన వెనుక పదిమంది వుండాల్సిందేనట. అంతేకాదు అప్పట్లో ఆయన చేతుల్లో తన్నులు తిన్న ఓ వ్యక్తికి 13 కుట్లు పడ్డాయంటే అల్లు అరవింద్ గురించి ప్రత్యేకంగా చెప్పనక్కర్లేదు.

అలీ హోస్ట్‌గా... ఈటీవీలో ప్రసారమవుతోన్న అలీతో సరదాగా కార్యక్రమానికి గెస్ట్‌గా అల్లు అరవింద్ వచ్చారు. రెండు భాగాలుగా ప్రసారమైన ఈ కార్యక్రమంలో పలు ఆసక్తికరమైన విషయాలను ఆయన పంచుకున్నారు. ఈ సందర్భంగా తన బావమరిది, మెగాస్టార్ చిరంజీవితో వున్న అనుబంధాన్ని.. మద్రాస్ నగరంలో తన కాలేజ్ డేస్‌, నిర్మాతగా తొలి రోజులను షేర్ చేసుకున్నారు అల్లు అరవింద్.

చిరంజీవి బంధువు కాదు.. నా బెస్ట్ ఫ్రెండ్ :

చిరంజీవిని బంధువుగా కంటే మిత్రుడిగా తాను చాలా ఇష్టపడతానని చెప్పారు అరవింద్. పైగా చెల్లెలి భర్త కావడంతో ఆయనంటే గౌరవం, ప్రేమ అని అలాంటిది చిరంజీవిని ఎవరైనా ఏమైనా అంటే వాళ్లకి మామూలుగా వుండేది కాదని పేర్కొన్నారు. అలా ఓ గొడవ గురించి ప్రస్తావించారు అల్లు అరవింద్. అప్పుడు ప్రొడక్షన్ మేనేజర్‌ను కొడితే అతనికి 13 కుట్లు పడ్డాయని తెలిపారు. అసలు ఆ గొడవకు దారి తీసిన కారణమేంటంటే..?

అతను తాగితే మనిషి కాదు:

అప్పట్లో చిరంజీవి డేట్స్ చూసేందుకు ఓ ప్రొడక్షన్ మేనేజర్ వుండేవారని.. కానీ ఆయన మద్యం సేవిస్తే మాత్రం వెనుకాముందు చూసుకోకుండా మాట్లాడేసేవారని అరవింద్ చెప్పారు. అలా చిరంజీవిని కూడా డ్రింక్ చేసి అమర్యాదగా మాట్లాడుతుంటే.. తాను చాలా సార్లు చెప్పిచూశానని, కానీ ఓ సారి దేవీ థియేటర్‌లో తాను.. చిరంజీవి సహా చాలా మంది పెద్దలందరం కలిసి సినిమా చూస్తున్నట్లు తెలిపారు అరవింద్. సరిగ్గా అదే సమయంలో ఆ ప్రొడక్షన్ మేనేజర్ మందు తాగి వచ్చి.. చిరంజీవిని పిలవ్వయ్యా మాట్లాడాలంటూ అసభ్యకరంగా మాట్లాడాడని, తాను అతనిని కారు ఎక్కించే ప్రయత్నం చేసినా వినిపించుకోకుండా తనను తోసేశాడని అరవింద్ తెలిపారు.

చిరంజీవి కొట్టుంటే విషయం పెద్దదయ్యేది:

అతని తీరుతో తనకు బాగా కోపం వచ్చి.. చేతికున్న వాచీ, కళ్లజోడు తీసేసి సదరు ప్రొడక్షన్ మేనేజర్‌ను కాలర్ పట్టుకుని బయటకు లాక్కొచ్చి కొట్టానని, అతనికి 13 కుట్లు పడ్డాయని పేర్కొన్నారు. ఒకవేళ అప్పుడు తాను అలా కొట్టకపోయుంటే.. చిరంజీవి చేతుల్లో దెబ్బలు పడేవి... ఆయన కొట్టుంటే విషయం చాలా పెద్దదయ్యేదని అరవింద్ తెలిపారు. తాను ఎవరినైనా ఇష్టపడితే ఇలాగే వుంటుందని చెప్పారు. కానీ ఈ సంఘటన జరిగిన తర్వాత చాలా సేపు బాధపడ్డానని ఆయన ఆవేదన వ్యక్తం చేశారు.