త‌మిళంలో విజ‌యం సాధించిన  ‘తమిళ పడం’  సినిమాని అల్లరి నరేష్, మోనాల్ గజ్జర్ జంటగా 2012లో ‘సుడిగాడు’ పేరుతో రీమేక్ చేశారు దర్శకుడు భీమనేని శ్రీనివాసరావు. తెలుగులో కూడా ఈ మూవీ బాక్సాఫీస్ వద్ద మంచి వసూళ్లు రాబట్టింది. ఒక విధంగా అల్లరి నరేష్‌కు ఈ చిత్రం తర్వాత సాలిడ్ హిట్ లేదనే చెప్పొచ్చు.  ఇదిలా ఉంటే.. ప్రస్తుతం ‘తమిళ పడం’ సీక్వెల్‌గా ‘తమిళ పడం 2.O’ని తెర‌కెక్కిస్తున్నారు. ఈ చిత్రాన్ని వేసవి కానుకగా విడుదల చేయడానికి ప్లాన్ చేస్తున్నారు.

ఈ నేప‌థ్యంలోనే.. భీమనేని శ్రీనివాసరావు ‘తమిళ పడం 2.O’ ని కూడా తెలుగులో రీమేక్ చేస్తున్నారు. అల్లరి నరేష్, సునీల్ కథానాయకులుగా తెరకెక్కుతున్న ఈ చిత్రానికి ‘సిల్లీ ఫెలోస్’ అనే టైటిల్‌ను ఫిక్స్ చేసార‌ని స‌మాచారం. శరవేగంగా చిత్రీకరణ జరుపుకుంటున్న ఈ చిత్రంలో నందిని రాయ్ నాయికగా నటిస్తోంది. హిలేరియ‌స్ ఎంట‌ర్‌టైన‌ర్‌గా తెరకెక్కుతున్న ఈ సినిమాతో అల్లరి నరేష్, సునీల్ విజయాన్ని అందుకుంటారని చిత్ర వర్గాలు పేర్కొంటున్నాయి.  కాగా, ఈ సినిమా జూన్ నెలలో ప్రేక్షకుల ముందుకు రానుంది.