ఏపీ రాజధాని అమరావతిలో జనసేన అధినేత పవన్ కల్యాణ్ పర్యటిస్తున్న సంగతి తెలిసిందే. రెండ్రోజుల పర్యటనలో భాగంగా శుక్రవారం నాడు కురగల్లు గ్రామస్తులతో జనసేనాని భేటీ అయ్యారు. ఈ సందర్భంగా మీడియాతో మాట్లాడిన పవన్.. రాజధాని విషయంలో ప్రభుత్వం క్లారిటీ ఇవ్వాలని డిమాండ్ చేశారు. అంతటితో ఆగని ఆయన.. రాజధాని విషయమై కేంద్రంతో చర్చలు జరుపుతామని ఒకింత వైసీపీ ప్రభుత్వానికి ఆయన వార్నింగ్ ఇచ్చారు. అయితే జనసేనాని వ్యాఖ్యలపై మంగళగిరి ఎమ్మెల్యే ఆళ్ల రామకృష్ణారెడ్డి స్పందిస్తూ స్ట్రాంగ్ కౌంటరిచ్చారు.

ఎందుకిలా పవన్!?

పవన్‌కు నిజంగా రాజధానిపై ప్రేమ ఉంటే ఇక్కడ ఎందుకు పోటీ చేయలేదు..? అని ఈ సందర్భంగా ఆళ్ల ప్రశ్నించారు. పోనీ.. కనీసం వారి పార్టీ అభ్యర్థినైనా ఎందుకు పోటీకి పెట్టలేదు..? అని ప్రశ్నించారు. లెప్ట్‌ పార్టీ అభ్యర్థి తరఫున ఎందుకు ప్రచారం చేయలేదని ఇలా పలు ప్రశ్నల వర్షం కురిపించారు. ‘లోకేష్‌ గెలుపునకు తెర వెనుక పవన్‌ ప్రయత్నాలు ప్రజలకు తెలుసు. ఇవాళ రైతులపై ప్రేమ ఉన్నట్లు నటిస్తే జనం నమ్మరు. చంద్రబాబు ప్యాకేజీ అందినప్పుడు ఒకలా.. అందినప్పుడు మరోలా మాట్లాడటం పవన్‌కు అలవాటు అయ్యింది. చంద్రబాబు హయాంలో జరిగిన మోసాలను పవన్‌ బయటపెట్టాలి. అక్రమాలు జరుగుతున్నాయని అప్పట్లో బేతపూడిలో పవన్‌ ప్రకటించారన్న విషయాన్ని గుర్తుకు తెచ్చుకోవాలి. భూసేకరణ చేస్తే ఆమరణ నిరాహార దీక్ష చేస్తానని పవన్‌ ప్రకటించారు. ఆ తరువాత నాలుగు సార్లు భూసేకరణ జరిపితే పవన్‌ ఏమయ్యారు’ అని ఈ సందర్భంగా పవన్‌పై ఆళ్ల ప్రశ్నల వర్షం కురిపించారు. ఆళ్ల ప్రశ్నలపై పవన్ ఎలా రియాక్ట్ అవుతారో వేచి చూడాల్సిందే మరి.