మెగాపవర్ స్టార్ రామ్ చరణ్, బోయపాటి శ్రీను కాంబినేషన్లో ఓ సినిమా తెరకెక్కుతున్న విషయం తెలిసిందే. కైరా అద్వానీ కథానాయికగా నటిస్తున్న ఈ చిత్రంలో బాలీవుడ్ నటుడు వివేక్ ఒబెరాయ్ ప్రతినాయకుడిగా కనిపించనున్నాడు. ఇటీవల మొదటి షెడ్యూల్ ను పూర్తి చేసుకున్న ఈ చిత్రం షూటింగ్ శరవేగంగా జరుగుతోంది. ఈ షెడ్యూల్ లో కొన్ని భావోద్వేగ సన్నివేశాల్ని సీనియర్ నటి స్నేహాపై చిత్రీకరించారు. ఇక ఈ నెల నుంచి జరిగే రెండో షెడ్యూల్ లో చరణ్ కూడా పాల్గొననున్నారు.

ఈ సినిమాలో చరణ్ పాత్రని ఇటు మాస్, అటు క్లాస్ ప్రేక్షకులను ఆకట్టుకునేలా దర్శకుడు తీర్చిదిద్దుతున్నారని సమాచారం. గత చిత్రం సరైనోడు`లో స్టైలిష్ స్టార్ అల్లు అర్జున్ ని కొత్తగా చూపించిన బోయపాటి.. ఈ చిత్రంలో కూడా చరణ్ కోసం ప్రత్యేకంగా కసరత్తు చేస్తున్నారని వార్తలు వినిపిస్తున్నాయి. తాజా సమాచారం ప్రకారం...ఈ సినిమా చిత్రీకరణని వేసవి కల్లా పూర్తి చేసి, జూలై నెలలో విడుదల చేయడానికి బోయపాటి ప్లాన్ చేస్తున్నారట. ఇక దేవిశ్రీ ప్రసాద్ స్వరాలు అందిస్తున్న ఈ సినిమాలో చరణ్‌కు అన్న పాత్రలో తమిళ నటుడు ప్రశాంత్ నటిస్తున్నారు.