టైటిల్ చూసి ఇదేంటి అలీని తమన్నా చీకొట్టడమేంటని అనుకుంటున్నారా..? అదేనండి ఇదంతా మీరు అనుకుంటున్నట్లుగా కమెడియన్ అలీ.. హీరోయిన్ తమన్నా గురించి కాదండోయ్.. తెలుగు రియాల్టీ షో బిగ్‌బాస్-03 గురించి. సీరియల్ నటుడు అలీ రెజా.. వైల్డ్ కార్డ్ ద్వారా ట్రాన్స్‌జెండర్ తమన్నా సింహాద్రి ఎంట్రీ ఇచ్చిన విషయం విదితమే. తమన్నా ఎంట్రీ ఇచ్చినప్పట్నుంచి షోకు కొత్త కళ వచ్చిందని చెప్పుకోవచ్చు. అయితే ఆమె వాడే పదజాలం మాత్రం కాసింత అసహ్యంగా ఉంది.

తమన్నాలా ఎందుకు మారారు!?

గురువారం జరిగిన ఎపిసోడ్‌లో మొత్తం జైలు చుట్టూనే తిరిగింది. ఇక తమన్నా-రాహుల్‌ల విషయానికొస్తే.. జైలులో ఉన్న తమన్నాకు సింగర్‌ రాహుల్ సిప్లిగంజ్ ఆసక్తికరమైన ప్రశ్న వేశాడు. ‘మీ పేరెంట్స్ అంతా మామూలుగానే ఉంటారు కదా.. మీరు ఒక్కరే ఇలా ఎందుకయ్యారు’ అని అడగ్గా.. దీని సావదానంగానే స్పందించిన తమన్నా పెద్ద సినిమా రేంజ్‌లో స్టోరీనే చెప్పుకొచ్చింది.

తమన్నా మాటల్లోనే..!

"చిన్నప్పటి నుంచి నాకు ఆడపిల్లలా ఉండటం ఇష్టం. అమ్మ కూడా అమ్మలాగే రెడీ చేసేది. గౌనులు వేసుకుని అలంకరించుకునేదాన్ని. నా శరీరం మొత్తం పూర్తిగా మార్చుకుని అమ్మాయిలా మారాలనుకున్నాను. అందుకే ఇంట్లో నుంచి బయటకు వచ్చేసి ఆపరేషన్ చేయించుకుని ఇలా మారాను. చిన్నప్పుడు నన్ను అందరూ నగ్మాలా ఉన్నాను అనేవారు’ అంటూ తమన్నా చెప్పుకొచ్చింది. సుమారు మూడు నిమిషాల పాటు జరిగిన వీరిద్దరి మధ్య సంభాషణ కాస్త ఆసక్తిగానే అనిపించింది.

అలీ వర్సెస్ తమన్నా..!

కింగ్‌గా అందరిపై ఆధిపత్యం చెలాయిస్తున్న అలీకి తమన్నా చుక్కలు చూపించింది. అందరితో పాటు తనపై కూడా పెత్తనం చెలాయిచడంతో ఇది మంచిది కాదు.. ఆమె సోషల్ యాక్టివిస్ట్ అంటూ జాపర్ రంగంలోకి దిగాడు. అయితే అప్పటి వరకూ సైలెంట్‌గా ఉన్న తమన్నా ఒక్కసారిగా రెచ్చిపోయి ‘అరేయ్ అలీ నీకు అసలు సిగ్గు, శరం ఏమైనా ఉందా?.. అసలు నువ్ తినేది అన్నమేనా? నువ్ మనషేనా’ అంటూ అలీకి వీర లెవల్‌లో విశ్వరూపం చూపించింది.

అస్సలు తగ్గని తమన్నా..!

నీ కంటే ముందు వరుణ్ సందేశ్ ఉన్నాడు.. ఇలాంటి పిచ్చి పిచ్చి వేషాలు చేయించాడా? అంటూ బండబూతులు తిట్టిపోసింది. తమన్నా సహనం కోల్పోయి మాట్లాడటంతో కంటెస్టెంట్లంతా కంగుతిన్నారు. వామ్మో.. తమన్నా మాములుగా లేదుగా అంటూ ఆశ్చర్యపోయారు. అయితే ఈ గొడవను అడ్డుకోవడానికి ఎందరూ ప్రయత్నించినా తమన్నా మాత్రం అస్సలు తగ్గేదే లేదంటూ రెచ్చిపోయింది.

నువ్వేం సూపర్ స్టార్‌వా!

అనంతరం ‘వీడికిలా బిగ్ బాస్ చెప్పాడు కదా అని నా క్యారెక్టర్ దిగజార్చుకోను.. వీడి నెత్తిమీద కిరీటం పెట్టుకుంటే.. కోతికి కొబ్బరికాయ ఇచ్చినట్టు ఉంది. వీడు చేసేది సీరియల్స్ ఇక్కడేదో సూపర్ స్టార్‌లా ఫీల్ అయిపోతున్నాడు. గుర్తుపెట్టుకో..

కాస్త బాడీ ఉండి తెల్లగా ఉంటే హీరో అనుకుంటున్నావేమో.. నీకు అంత సీన్ లేదు. నువ్ హీరో అవ్వాలనుకున్నా కానివ్వరని తెలుసుకో. నిన్ను స్టార్ కాకుండా నేనే అడ్డుగా ఉంటా. నేను బిగ్ బాస్ హౌస్‌కి వచ్చేటప్పుడు విలన్ ఎవరా అని చూశా.. ఇప్పుడు నాకు అర్ధమైంది. అలీ గాడు విలన్ నేను హీరోయిన్. ఇక నుండి గేమ్ మొదలు’ అంటూ గట్టిగానే అలీకి.. తమన్నా వార్నింగ్ ఇచ్చింది.

ఈ ఎపిసోడ్‌లో హైలైట్స్ ఇవే...

మొత్తానికి చూస్తే గురువారం జరిగిన ఈ ఎపిసోడ్‌ చాలా హాట్ హాట్‌గా నడిచిందని చెప్పుకోవచ్చు. ముఖ్యంగా తమన్నా రంగంలోకి దిగితే వార్ వన్ సైడ్ అన్నట్టుగా రెచ్చిపోయింది. ఈ ఎపిసోడ్ మొత్తానికి రాహుల్ తమన్నా మధ్య జరిగిన ఆసక్తికర సంభాషణ.. అలీ-తమన్నా మధ్య జరిగిన గొడవే హైలైట్‌గా నిలిచాయి. మరీ ముఖ్యంగా.. డైమండ్‌ టాస్క్‌.. అలీ కింగ్‌లా మారడం.. ఇంట్లో అధికారం చెలాయించడం అనే ఆటలో పెద్ద రచ్చ జరిగిందని చెప్పుకోవచ్చు. ఆడవారి వేషం వేయలేనని జాఫర్‌, వరుణ్‌ సందేశ్‌లు ఎదురుతిరగడం.. అలీ రెజా, అషూ రెడ్డిపై తమన్నా ఘాటు వ్యాఖ్యలు చేయడం.. వరుణ్‌ సందేశ్‌ ఇంటి మొదటి కెప్టెన్‌గా ఎన్నిక కావడం నేటి ఎపిసోడ్‌లో హైలెట్‌గా నిలిచాయని చెప్పడంలో ఎలాంటి సందేహాలు అక్కర్లేదు. ఇక తదుపరి రేపటి ఎపిసోడ్ చాలా ఎమోషనల్‌గా ఉండబోతుందని ప్రోమోను బట్టి చూస్తే అర్థమవుతోంది. అంటే గురువారం అంతా ఆంగ్రీగా.. శుక్రవారం మాత్రం ఎమోషనల్‌గా కంటెస్టెంట్లంతా రక్తికట్టించనున్నారన్న మాట.