தொழில்நுட்ப பரிணாமத்தில் புதிய தொழில்நுட்பம் பழைய தொழில்நுட்பத்தை வீழ்த்தி வருவது சகஜமே. இந்த நிலையில் சினிமாவுக்கு இணையாக தற்போது தொலைக்காட்சி சீரியல்கள் புகழ் பெற்று வரும் நிலையில் வெப் சீரீஸ் என்ற இணையதள தொடர்களும் புகழ்பெற்று விளங்குகின்றன.

வெளிநாடுகளில் பிரபலமாக இருக்கும் இந்த வெப் சீரீஸ் தற்போது கோலிவுட்டிலும் புகுந்துவிட்டது. பாலாஜி மோகனின் 'As I am Suffering from Kadhal' மற்றும் கவுதம் மேனனின் வெப்சீரீஸ் தற்போது பரபரப்பாக பேசப்பட்டு வருகிறது. இந்த நிலையில் அஜித்தின் 'விவேகம்' பட நடிகையும் உலக நாயகன் கமல்ஹாசனின் மகளுமாகிய அக்சராஹாசன், வெப் சீரீஸ் ஒன்றில் நடிக்கவிருப்பதாக செய்திகள் வெளியாகின.

இதுகுறித்து கருத்து கூறிய அக்சராஹாசன், 'இதுவரை நான் எந்த வெப்சீரீஸில் நடிக்க ஒப்பந்தமாகவில்லை. ஆனால் ஒருசிலரிடம் இதுகுறித்து பேசி வருவது உண்மைதான். வெப்சீரீஸ் என்பது லேட்டஸ்ட் டிரெண்ட். இனிவரும் காலங்களில் வெப் சீரீஸ் அதிக அளவில் மக்களிடம் போய் சேரும். அதே நேரத்தில் சினிமாவை வெப்சீரீஸ் பின்னுக்கு தள்ளும் என்று நான் நினைக்கவில்லை. சினிமாவும், வெப்சீரிஸ்களும் இரண்டுமே வருங்காலத்தில் ஒன்றோடு ஒன்று  இணைந்து புகழ்பெற வேண்டும் என்பதுதான் எனது விருப்பம்' என்று கூறியுள்ளார்.