ఇప్పుడున్న యువ హీరోలు అగ్ర క‌థానాయ‌కుల అభిమానులుగా కనిపించ‌డం స‌ర్వ సాధార‌ణ‌మైన విష‌యంగా మారింది. ఒక‌ప్పుడు స్టేజీల‌పై క‌న‌ప‌డే ఈ అభిమానం.. ఇప్పుడు వెండితెర‌పై కూడా పాకింది. ఏదైతేనేం.. ఇదే బాట‌లో ఓ అక్కినేని హీరో అడుగుపెడుతున్నాడు. ఆ హీరో ఎవ‌రో కాదు.. అక్కినేని నాగ‌చైత‌న్య‌. రీసెంట్‌గానే శేఖ‌ర్ క‌మ్ముల ద‌ర్శ‌క‌త్వంలో ‘ల‌వ్‌స్టోరి’ సినిమాను పూర్తి చేసుకున్న చైత‌న్య ఇప్పుడు ‘థాంక్యూ’ సినిమా షూటింగ్‌తో బిజి బిజీగా ఉన్నాడు. ‘మ‌నం’ వంటి సెన్సేష‌న‌ల్ హిట్ త‌ర్వాత చైత‌న్య‌, డైరెక్ట‌ర్ విక్ర‌మ్ కుమార్ కాంబినేష‌న్‌లో రూపొందుతోన్న చిత్ర‌మిది. బీవీఎస్ ర‌వి అందించిన క‌థ‌తో రూపొందుతోన్న మూవీ ఇది.

తాజా స‌మాచారం మేర‌కు ఈ చిత్రంలో చైత‌న్య .. సూప‌ర్‌స్టార్ మ‌హేశ్ అభిమాని పాత్ర‌లో కనిపిస్తాడ‌ని అంటున్నారు. దీనికి సంబంధించిన స‌న్నివేశాల‌ను కూడా రీసెంట్‌గా చిత్రీక‌రిస్తార‌ట‌. ఈ సినిమాలో నాగ‌చైత‌న్య.. అభిరామ్ అనే పాత్ర‌లో క‌నిపించ‌నున్నాడు. ఇది ఓ ర‌కంగా అక్కినేని అభిమానుల‌కే కాదు, సూప‌ర్‌స్టార్ మ‌హేశ్ అభిమానుల‌కు కూడా కిక్కు ఇచ్చే విష‌య‌మే. ప్రముఖ నిర్మాణ సంస్థ శ్రీ వెంకటేశ్వర క్రియేషన్స్ బ్యానర్‌పై దిల్‌రాజు, శిరీష్ ఈ చిత్రాన్ని నిర్మిస్తున్నారు.