కింగ్ నాగార్జున తన రెండో కుమారుడు అఖిల్‌ను ఇండస్ట్రీకి పరిచయం చేసే బాధ్యతను ప్రముఖ డైరెక్టర్ వి.వి.వినాయక్‌కు అప్పగించారు. నితిన్ హోం బ్యానర్ శ్రేష్ఠ్ మూవీస్ పతాకంపై.. 'అఖిల్' చిత్రాన్ని వినాయక్ తెరకెక్కించారు. ఆ సినిమా ఆశించినంత విజయం సాధించక పోవడంతో..రీ-లాంచింగ్ అంటూ అఖిల్ రెండో సినిమాని బ్రిలియంట్ డైరెక్టర్ విక్రమ్ కుమార్ చేతిలో పెట్టారు నాగార్జున.

'హలో'గా ప్రేక్షకుల ముందుకు వచ్చిన ఈ సినిమా..స్వయంగా ఎన్నో జాగ్రత్తలు తీసుకుని మ‌రీ నాగ్‌ సొంత సంస్థలో నిర్మించినప్పటికీ.. అభిమానులను ఆశించిన స్థాయిలో ఆకట్టుకోలేకపోయింది. కాని లుక్స్ పరంగా, నటన పరంగా 'హలో' చిత్రంతో అభిమానులను కొంత వరకు సంతృప్తి పరిచాడు అఖిల్.

ఇక ఇప్పుడు అఖిల్ మూడవ సినిమా విష‌యంలో ఆలోచనలో పడ్డ నాగార్జునకి..రామ్ గోపాల్ వర్మ ఒక కొత్త‌ డైరెక్టర్‌ని పరిచయం చేసారని ఇండస్ట్రీలో టాక్ వినిపిస్తోంది. ఆ డైరెక్టర్ ప్రతిభ, నైపుణ్యం గురించి నాగ్‌తో చెప్పిన వర్మ.. అఖిల్‌ మూడవ సినిమా తనతో తీస్తే బాగుంటుందని సలహా కూడా ఇచ్చారని సమాచారం. మరి వర్మ సలహాకి నాగ్ ఎటువంటి నిర్ణయం తీసుకోనున్నారో చూడాలి.