అక్కినేని అఖిల్ మూడో సినిమాకి డైరెక్టర్ దొరికారా? అవున‌నే వినిపిస్తోంది టాలీవుడ్ స‌ర్కిల్స్‌లో. కాస్త వివ‌రాల్లోకి వెళితే.. అఖిల్`, హలో` ఆశించినంత విజయాల్ని అందివ్వలేకపోవడంతో.. అఖిల్ త‌న‌ మూడో సినిమాని ఎవరితో చేస్తారా అని ఇండస్ట్రీ వర్గాలతో పాటు అక్కినేని ఫ్యాన్స్ కూడా ఆసక్తిగా ఎదురుచూశారు. ఈ క్ర‌మంలో సుకుమార్, అట్లి, బోయపాటి శ్రీను వంటి దర్శకుల పేర్లు కూడా వినిపించాయి. కాని ఇప్పుడు మ‌రో దర్శకుడి పేరు తెర‌పైకి వ‌చ్చింది. ఈ దర్శకుడితో కలిసి పని చేయడానికి అఖిల్ కూడా ఆసక్తి కనబరచడంతో.. ఇక నాగార్జున గ్రీన్ సిగ్నల్ కోసం ఎదురుచూస్తున్నారు అఖిల్ అండ్ డైరెక్టర్. ఆ డైరెక్టర్ మరెవరో కాదు.. నాగార్జున కెరీర్‌లో శివ` లాంటి ట్రెండ్ సెట్టింగ్ ఫిలింని అందించిన రాంగోపాల్ వర్మ.

అవును...వర్మ, అఖిల్ మూడో చిత్రాన్ని డైరెక్ట్ చేయబోతున్నార‌ట‌. ప్రస్తుతం నాగ్ సినిమాని తెరకెక్కించే పనిలో ఉన్నారు వర్మ. ఈ సినిమా తర్వాత అఖిల్ సినిమా ఉంటుందని టాలీవుడ్ వర్గాలు పేర్కొంటున్నాయి. అసలు అఖిల్ మూడో సినిమాని వర్మ దగ్గర అసిస్టెంట్‌గా పనిచేస్తున్న మంజు చేయాల్సి ఉంది. మంజు చెప్పిన కథ అఖిల్‌కు నచ్చింది కూడా...కాకపోతే మంజుకి బదులు వర్మ డైరెక్ట్ చేస్తే బాగుంటుందని....ఈ క్రమంలో వర్మపై వొత్తిడి తెచ్చి మరీ వర్మని అఖిల్ ఒప్పించాడని సమాచారం. ఇప్ప‌టికే వర్మ, అఖిల్ కలయికలో ఒక షార్ట్ ఫిలిం రూపొందింది. త్వ‌ర‌లోనే ఇది విడుద‌ల కానుంది. మ‌రి.. సంచలనాలకు మారు పేరైన వర్మ...అఖిల్ సినిమాతో మరెన్ని సంచలనాలను సృష్టిస్తారో చూడాలి.