అక్కినేని కుటుంబంలో మూడో తరం వారసుడిగా ఎంట్రీ ఇచ్చారు అఖిల్. వరుసపెట్టి సినిమాలు చేస్తున్నా అఖిల్‌కు మాత్రం సరైన హిట్ దక్కడం లేదు. మధ్యలో ఒకటి రెండు సినిమాలు విజయం సాధించినప్పటికీ.. చెప్పుకోగదగ్గ స్థాయిలో కమర్షియల్ హిట్ మాత్రం అఖిల్‌ ఖాతాలో పడలేదు. అందుకే ఈసారి ఎలాగైనా హిట్ కొట్టాలని గట్టి పట్టుదలగా వున్నారు అఖిల్. ఈ క్రమంలోనే ఆయన చేస్తున్న సినిమా ‘ఏజెంట్’. ఇందులో ఆయన గూఢచారి పాత్రలో కనిపించనున్నారు. ఇందుకోసం తనను తాను మార్చుకున్నారు అఖిల్. ఈ సినిమాలో బాడీ, హెయిర్ కోసం రెండేళ్ల పాటు కష్టపడ్డాడు.

యాక్షన్ సీక్వెన్స్‌లో ఇరగదీసిన అఖిల్ :

రిలీజ్ డేట్ దగ్గరపడుతూ వుండటంతో చిత్ర యూనిట్ ప్రమోషన్ కార్యక్రమాలను వేగవంతం చేసింది . తాజాగా మంగళవారం ఏజెంట్ ట్రైలర్‌ను విడుదల చేశారు. ఇప్పటి వరకు లవర్ బాయ్‌లా కనిపించిన అఖిల్.. ఇందులో సీరియస్ రోల్‌లో నటించారు. ట్రైలర్ ప్రారంభం నుంచి చివరి వరకు గన్స్, హెలికాఫ్టర్స్, చేజింగ్‌లు, యాక్షన్ సీక్వెన్స్‌తో నింపేశారు. నువ్వు స్పైగా ఎందుకు మారాలనుకుంటున్నావ్ అని అఖిల్‌ను అడుగుతున్న సంభాషణలతో ట్రైలర్ ప్రారంభమైంది. సింహం బోనులోకి వెళ్లి తిరిగొచ్చేది కోతి మాత్రమేనని మమ్ముట్టి చెప్పిన డైలాగ్ ఆకట్టుకుంది. చివరిలో రెండు భారీ మెషిన్ గన్స్ పట్టుకుని యుద్ధానికి రెడీ అయిన అఖిల్‌ను చూస్తే గూస్ బంప్స్ ఖాయం. మొత్తంగా స్టన్నింగ్, యాక్షన్, థ్రిల్లింగ్ ఎలిమెంట్స్‌తో ట్రైలర్‌ను నింపేశారు.

ఏప్రిల్ 28న ప్రేక్షకుల ముందుకు ఏజెంట్ :

ఇకపోతే.. ఏకే ఎంటర్‌టైన్‌మెంట్స్ బ్యానర్‌పై తెరకెక్కుతోన్న ఈ ఏజెంట్ సినిమాను సురేందర్ రెడ్డి డైరెక్ట్ చేస్తున్నారు. అఖిల్ సరసన సాక్షి వైద్య నటిస్తున్నారు. మలయాళ మెగాస్టార్ మమ్ముట్టి చాలా రోజుల తర్వాత ఓ తెలుగు సినిమాలో కీలక పాత్ర పోషిస్తున్నారు. స్టార్ రైటర్ వక్కంతం వంశీ ఈ సినిమాకు కథను అందించారు. ఏప్రిల్ 28న ఈ సినిమా ప్రపంచవ్యాప్తంగా తెలుగు, తమిళ, హిందీ, కన్నడ, మలయాళ భాషల్లో విడుదల కానుంది.