அஜித் நடித்த 'தீனா' படத்தின் மூலம் இயக்குனராக அறிமுகமான ஏ.ஆர்.முருகதாஸ் மீண்டும் அஜித் படத்தை இயக்கவேண்டும் என்று ரசிகர்கள் சமூக வலைத்தளம் மூலம் அவ்வப்போது விருப்பத்தை தெரிவித்து வருகின்றனர். அஜித் சம்மதித்தால் உடனே அவரை இயக்க தயார் என்று ஏ.ஆர்.முருகதாசும் பலமுறை அறிவித்துள்ளார். எனவே விரைவில் அவர் அஜித் படத்தை இயக்குவார் என்று எதிர்பார்க்கப்படுகிறது.

ஆனால் அதற்கு முன்னர் அஜித் மற்றும் முருகதாஸ் படங்கள் ஒரே நாளில் மோதும் சூழ்நிலையும் தற்போது ஏற்பட்டுள்ளது. அஜித் நடித்து வரும் 'தல 57' திரைப்படத்தின் ரிலீஸ் தேதி தமிழ் புத்தாண்டு தினத்தில் இருந்து ரம்ஜான் தினத்திற்கு மாற்றப்பட்டதாக ஒரு செய்தி வெளிவந்து கொண்டிருக்கும் நிலையில் மகேஷ்பாபு நடிப்பில் ஏ.ஆர்.முருகதாஸ் இயக்கி வரும் 'மகேஷ்பாபு 23' படமும் அதே நாளில் வெளியாக அதிக வாய்ப்பு இருப்பதாக கூறப்படுகிறது.

மிகப்பெரிய எதிர்பார்ப்பை ஏற்படுத்தியிருக்கும் 'தல 57' படமும், மகேஷ்பாபுவின் முதல் நேரடி தமிழ்ப்படமான 'மகேஷ்பாபு 23' படமும் ஒரே நாளில் வெளியாவது உறுதி செய்யப்பட்டால் அஜித்துக்கு முருகதாஸ் கடும் போட்டியை ஏற்படுத்துவாரா? என்பதை பொறுத்திருந்து பார்ப்போம்.