அஜித் நடித்த ’துணிவு’ திரைப்படம் வரும் பொங்கல் தினத்தில் வெளியாக உள்ளது என்பதும் விஜய்யின் 'வாரிசு’க்கு போட்டியாக வரும் இந்த படம் ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது என்பது குறிப்பிடத்தக்கது.

இந்த நிலையில் ’துணிவு’ படத்தை அடுத்து அஜீத் நடிக்க இருக்கும் ‘ஏகே 62’ என்ற படத்தை லைகா நிறுவனத்தின் சுபாஷ்கரன் தயாரிக்க உள்ளார் என்பதும் இந்த படத்தை விக்னேஷ் சிவன் இயக்கவுள்ளார் என்பதும் தெரிந்ததே. அனிருத் இசையமைக்கவுள்ள இந்த படத்தின் ஆரம்பகட்ட பணிகள் தொடங்கி விட்டதாகவும் அடுத்த மாதம் இந்த படத்தின் படப்பிடிப்பு தொடங்கும் என்றும் கூறப்படுகிறது.

இந்த நிலையில் ‘ஏகே 62’ படத்தின் படப்பிடிப்பு தொடங்கும் முன்பே இந்த படத்தின் வியாபாரம் தொடங்கிவிட்டதாக செய்திகள் வெளியாகியுள்ளன. ‘ஏகே 62’படத்தின் டிஜிட்டல் ரிலீஸ் உரிமையை நெட்பிளிக்ஸ் நிறுவனம் மிகப்பெரிய தொகையைக் கொடுத்து பெற்றுள்ளதாக கூறப்படுகிறது.

ஏற்கனவே விஜய்யின் ’தளபதி 67’ படத்தின் படப்பிடிப்பு தொடங்கும் முன்பே வியாபாரம் தொடங்கி விட்டதைப் போலவே அஜித்தின் ‘ஏகே 62’ படத்தின் வியாபாரமும் தொடங்கிவிட்டது என்பது குறிப்பிடத்தக்கது.