ஏ.எம்.ரத்னம் தயாரிப்பில் தல அஜீத் நடித்து வரும் 'வேதாளம்' படத்தின் அனைத்து அறிவிப்புகளும் வியாழக்கிழமைகளில்தான் வெளிவருவதை பார்த்து வருகிறோம். தயாரிப்பாளர் ஏ.எம்.ரத்னம் அவர்கள் சாய்பாபாவின் தீவிர பக்தர் என்பதால் பூஜை முதல் ரிலீஸ் தேதி வரை இந்த செண்டிமெண்ட் படக்குழுவினர்களிடையே கடைபிடிக்கப்பட்டு வருகிறது.

இந்நிலையில் இந்த செண்டிமெண்ட் இசையமைப்பாளர் அனிருத்துக்காக முதல்முறையாக மீறப்பட்டுள்ளது. அனிருத்தின் பிறந்த நாள் வரும் 16ஆம் தேதி வெள்ளிக்கிழமை வருவதால், அவருக்கு பிறந்த நாள் பரிசாக அதே தேதியில் இந்த படத்தின் பாடல்கள் வெளியீட்டை நடத்த படக்குழுவினர் முடிவு செய்துள்ளனர். 16ஆம் தேதி அதிகாலை 12 மணிக்கு 'வேதாளம்' படத்தின் பாடல்கள் ரிலீசாகவுள்ளது. இந்த தகவலை அனிருத் தனது சமூக வலைத்தளத்தில் உறுதி செய்துள்ளார்.

டீசர் மற்றும் போஸ்டர்களை ஆர்ப்பாட்டத்துடன் வரவேற்ற அஜீத் ரசிகர்கள் பாடல்களையும் வரவேற்பார்கள் என்று எதிர்பார்க்கப்படுகிறது. அஜீத், ஸ்ருதிஹாசன், லட்சுமிமேனன், கபீர்சிங், சூரி, தம்பிராமையா, ராகுல்தேவ் உள்பட பலர் நடித்துள்ள இந்த படத்தை சிறுத்தை சிவா இயக்கியுள்ளார். வரும் தீபாவளி தினத்தில் இந்த படம் ரிலீஸாகவுள்ளது.