'சண்டக்கோழி 2' படத்தின் நாயகி ஆவாரா ஷாம்லி?
- IndiaGlitz, [Friday,July 24 2015]
விஷால் நடித்து வரும் பாயும் புலி' திரைப்படம் வரும் செப்டம்பரில் ரிலீஸாகவுள்ள நிலையில் அவரது அடுத்த படமான 'சண்டக்கோழி 2' படத்தின் ஸ்கிரிப்ட் தற்போது தயாராகி, நடிகர், நடிகர்களை புக் செய்யும் நிலைக்கு வந்துவிட்டதாக கூறப்படுகிறது.
முதலில் இந்த படத்தில் விஷாலுக்கு ஜோடியாக நடிக்கக்கூடிய நடிகைகளை தேர்வு செய்வதில் இயக்குனர் லிங்குசாமி தீவிரமாக உள்ளார். இந்த படத்தில் தமன்னா அல்லது நயன்தாரா நடிப்பார்கள் என்று வந்த செய்தியை விஷால் மறுத்த நிலையில், தற்போது அவருக்கு ஜோடியாக அஜீத் மனைவி ஷாலினியின் தங்கை ஷாமிலி நடிக்க வாய்ப்பு இருப்பதாக கூறப்படுகிறது.
வெளிநாட்டில் படிப்பை முடித்துவிட்டு சமீபத்தில் நாடு திரும்பிய ஷாமிலி, தமிழ் திரைப்படத்தில் நடிக்க நல்ல வாய்ப்பை எதிர்பார்த்து காத்திருக்கும் நிலையில் அவரது புகைப்படங்களை சமீபத்தில் இணையதளங்களில் பார்த்த லிங்குசாமி, சண்டக்கோழி 2' படத்தின் ஸ்கிரிப்டுக்கும் இவர் பொருத்தமாக இருப்பார் என கருதியதாக கூறப்படுகிறது. லிங்குசாமி தரப்பில் இருந்து ஷாமிலியிடம் பேச்சுவார்த்தை நடைபெற்று வருவதாகவும், விரைவில் இதுகுறித்த அறிவிப்பு வெளிவரும் என்றும் கூறப்படுகிறது.
மேலும் சண்டக்கோழி முதல் பாகத்தில் விஷாலுக்கு ஜோடியாக நடித்த மீரா ஜாஸ்மின், மற்றும் அப்பாவாக நடித்த ராஜ்கிரண் ஆகிய இருவருமே இந்த படத்தில் நடிக்கவுள்ளனர். மேலும் இந்த படத்தில் டி.இமான் இசையமைப்பார் என்றும் கூறப்படுகிறது.