தல அஜித் நடித்து வரும் 'பிங்க்' ரீமேக் படமான 'தல 59' திரைப்படத்தின் படப்பிடிப்பு ஐதராபாத்தில் உள்ள ராமோஜிராவ் பிலிம் சிட்டியில் நடந்து வரும் நிலையில் கடந்த இரண்டு நாட்களுக்கு முன் தேசிய விருது பெற்ற இயக்குனர் பிரியதர்ஷன் மற்றும் மலையாள சூப்பர் ஸ்டார் மோகன்லால் ஆகியோர்களை அஜித் சந்தித்து பேசினார் என்பதை ஏற்கனவே பார்த்தோம்.

இந்த நிலையில் 'தல 59' படத்தின் படப்பிடிப்பு நடந்து வரும் அதே ராமோஜிராவ் பிலிம்சிட்டியில் 'பாகுபலி நாயகன் பிரபாஸ் நடிக்கும் படம் ஒன்றின் படப்பிடிப்பும் நடந்து வருகிறது. ஓய்வு நேரத்தில் பிரபாஸ் நடித்து வரும் செட்டிற்கு சென்ற அஜித், பிரபாஸை சந்தித்து சுமார் ஒருமணி நேரம் பேசிக்கொண்டிருந்தாராம்.

ஏற்கனவே அஜித்துடன் 'ஆரம்பம்' படத்தில் நடித்த ராணா மூலம் அஜித் குறித்து பல விஷயங்களை கேள்விப்பட்டிருந்த பிரபாஸ், அஜித்தை நேரில் பார்த்த பின்னர், தான் கேள்விப்பட்டதை விட பலமடங்கு அஜித்திடம் நல்ல குணம் இருப்பதை கண்டு ஆச்சரியமடைந்தாராம்.

ஒரே வாரத்தில் பிரியதர்ஷன், மோகன்லால் மற்றும் பிரபாஸ் என மூன்று பிரபலங்களை சந்தித்துள்ள அஜித் இன்னும் யார் யாரை சந்திக்கவுள்ளார் என்பதை பொறுத்திருந்து பார்ப்போம்.