ఏ సినిమా చేసినా ప్రాణం పెట్టి చేయడం అజిత్ స్టైల్. తమిళంలో అగ్ర కథానాయకుల్లో ఒకడిగా వున్నా... నేటికీ ఆయనలో అదే క్రమశిక్షణ, పట్టుదల. తాజాగా ఆయన హీరోగా తెరకెక్కుతోన్న యాక్షన్‌ చిత్రం ‘వాలిమై’. బాలీవుడ్ స్టార్ ప్రొడ్యూసర్ బోనీకపూర్‌ నిర్మిస్తోన్న ఈ సినిమాకు హెచ్‌ వినోద్‌ దర్శకత్వం వహిస్తున్నారు. హిందీ నటి హ్యుమా ఖురేషి అజిత్‌తో ఆడిపాడనుండగా.. తెలుగు యువనటుడు కార్తికేయ విలన్‌గా నటిస్తున్నాడు. ఇప్పటికే ఈ సినిమా నుంచి విడుదలైన పోస్టర్లు, టీజర్లు అభిమానులను ఎంతగానో ఆకట్టుకున్నాయి. హాలీవుడ్‌కు ఏమాత్రం తక్కువ కాకుండా యాక్షన్‌ సీక్వెన్స్‌ను తెరకెక్కించారని కోలీవుడ్ టాక్.

తమిళ, తెలుగు, హిందీ, కన్నడ భాషల్లో సంక్రాంతి కానుకగా జనవరి 13న వాలిమైను రిలీజ్ చేయాలని మేకర్స్ భావించారు. కానీ కోవిడ్ మహమ్మారి వారి ఆశలపై నీళ్లు చల్లింది. అప్పుడు దేశంలో నెలకొన్న ప్రతికూల పరిస్ధితుల కారణంగా వాలిమై రేసు నుంచి వెనక్కి తగ్గింది. ప్రస్తుతం కరోనా మహమ్మారి ఉద్ధృతి కాస్తంత తగ్గడంతో మళ్లీ పరిస్దితులు సాధారణ స్థితికి వస్తున్నాయి. ఈ నేపథ్యంలో వాలిమై మేకర్స్ కొత్త రిలీజ్ డేట్‌ను అనౌన్స్ చేశారు. ఫిబ్రవరి 24న తమిళ, తెలుగు, హిందీ, కన్నడ భాషల్లో ఈ సినిమాను విడుదల చేయబోతున్నట్లు ప్రకటించారు.

అయితే వాలిమై రిలీజైన మరుసటి రోజు అంటే ఫిబ్రవరి 25న పవర్‌స్టార్ పవన్ కల్యాణ్ నటించిన భీమ్లా నాయక్ కూడా ప్రేక్షకుల ముందుకు వచ్చే అవకాశం వుంది. కాకపోతే.. ఏప్రిల్ 1ని కూడా భీమ్లా నాయక్ లాక్ చేసి పట్టుకోవడంతో ఏ రోజు రిలీజ్ అవుతుందనే దానిపై క్లారిటి లేదు. ఒకవేళ ఫిబ్రవరి 25న దిగితే మాత్రం.. వాలిమైకి గట్టి పోటీ తప్పదు.