அஜித் நடித்து வரும் ‘விடாமுயற்சி’ படத்தின் படப்பிடிப்பு கடந்த சில மாதங்களாக நடந்து வருகிறது என்பதும் சமீபத்தில் தான் இந்த படத்தின் படப்பிடிப்பு இறுதிக் கட்டத்தை அடைந்தது என்றும் செய்தி வெளியானது. இந்நிலையில், படத்தின் டீசரை அதன் தயாரிப்பு நிறுவனம் சமீபத்தில் சமூக வலைதளங்களில் வெளியிட்டது.

சுமார் இரண்டு நிமிடங்களுக்கு நீளமான இந்த டீசர் தற்போது இணையத்தில் வேகமாக பரவி வருகிறது. இந்த டீசரில் வசனங்கள் இல்லாவிட்டாலும், அதிரடி ஆக்சன் காட்சிகள், மனைவியை தொலைத்த அஜித்தின் பரிதவிப்பு, மற்றும் அர்ஜுன் வில்லன் சிரிப்பு போன்ற சில சுவாரஸ்யமான காட்சிகள் இடம்பெற்றுள்ளன.

டீசரின் இறுதியில் "எல்லோரும் எல்லாமும் கைவிடும்போது உன்னை நம்பு" என்ற வரிகளுடன் முடிவடைகிறது. இந்த டீசர், அஜித் ரசிகர்களுக்கு மிகப் பெரிய பரிசாக இருக்கும் என எதிர்பார்க்கப்படுகிறது.

மகிழ் திருமேனி இயக்கத்தில் உருவாகியுள்ள இந்த படத்தில், அஜித், த்ரிஷா, அர்ஜூன், ரெஜினா, ஆரவ் உள்ளிட்ட நட்சத்திரங்கள் முக்கிய கதாபாத்திரங்களில் நடித்து இருக்கின்றனர். அனிருத் இசையமைப்பில், ஓம் பிரகாஷ் ஒளிப்பதிவில், ஸ்ரீகாந்த் படத்தொகுப்பில் உருவாகியுள்ள இந்த படத்தை லைகா நிறுவனம் மிகப்பெரிய பொருட்செலவில் தயாரித்துள்ளது. இந்த படம் அடுத்த ஆண்டில் வெளியாகும் என்று எதிர்பார்க்கப்படுகிறது.