ரஜினி மிஸ் செய்த படத்தில் நடித்த அஜித்: மனம் திறந்த கே.எஸ்.ரவிகுமார்
- IndiaGlitz, [Monday,January 20 2020]
சூப்பர் ஸ்டார் ரஜினிகாந்த் நடிக்க இருந்த ஒரு திரைப்படத்தில் அஜித் நடித்த தகவலை பிரபல இயக்குநர் கேஎஸ் ரவிக்குமார் பேட்டி ஒன்றில் சமீபத்தில் தெரிவித்துள்ளார்.
சூப்பர் ஸ்டார் ரஜினிகாந்த் நடிப்பில் கேஎஸ் ரவிக்குமார் இயக்குவதாக இருந்த ஒரு திரைப்படம்தான் அஜித் நடித்த ’வரலாறு’ திரைப்படம் என கே.எஸ்.ரவிகுமார் கூறியுள்ளார். இந்த திரைப்படத்தின் கதையை ஏற்கனவே ரஜினியிடம் அவர் கூறியபோது அந்த படத்தில் அவர் நடிக்க ஒப்புக்கொண்டு அந்த படத்திற்கான டைட்டில் கூட தேர்வு செய்து விட்டதாகவும் அதன்பின்னர் ஜக்குபாய் படத்தின் பணிகள் தொடங்கி திடீரென அந்த படம் நின்றுவிட்டதாகவும் கூறினார்.
இந்த நிலையில் ரஜினிகாந்த் ’சந்திரமுகி’ படத்தில் நடிக்கவும் சென்று விட்டதால் ’வரலாறு’ படத்தின் கதையை அஜித்திடம் கூறியதாகவும் அஜித்துக்கும் அந்த படத்தின் தயாரிப்பாளருக்கும் இந்த கதை பிடித்து விட்டதால் உடனடியாக படப்பிடிப்பு தொடங்கி விட்டதாகவும் கூறினார்.
இந்த நிலையில் ரஜினியை கே.எஸ்.ரவிகுமார் பின்னர் ஒருநாள் சந்தித்த போது ’வரலாறு’ படத்தில் நான் நடிப்பதாக கூறி இருந்தேனே ஏன் எனக்கு இந்த படத்தை தரவில்லை என ரஜினி கேட்டதாகவும், உண்மையில் அந்த படம் ரஜினிகாந்த் நடித்திருக்க வேண்டிய படம் என்றும் கேஎஸ் ரவிக்குமார் தனது பேட்டியில் கூறியுள்ளார்.
அஜித்தின் மிகப்பெரிய ஹிட் படம் ஒன்று ரஜினி மிஸ் செய்த படம் என்பது இந்த பேட்டியின் மூலம் தெரிய வருகிறது.