கொரோனா வைரஸுக்கு எதிராக நடைபெற்றுவரும் போரில் மத்திய மாநில அரசுகள் தீவிரமாக ஈடுபட்டு வரும் நிலையில், அரசுக்கு உதவி செய்யும் வகையில் தொழில் அதிபர்கள், அரசியல் பிரமுகர்கள், திரையுலகைச் சேர்ந்தவர்கள் என பலர் நிதி உதவி செய்து வருகின்றனர்.

இந்த நிலையில் கொரோனாவுக்கு எதிராகப் போராடுவதில் முக்கிய பங்கு பெற்றுள்ள மருத்துவர்களுக்கும் ஏராளமான உதவிகள் குவிந்து வருகிறது என்பது குறிப்பிடத்தக்கது. இந்த நிலையில் அஜித் நடித்த ’நேர்கொண்ட பார்வை’ படத்தில் முக்கிய கேரக்டரில் நடித்தவரும் பாலிவுட்டின் முன்னணி நடிகைகளில் ஒருவரான வித்யாபாலன் தற்போது மருத்துவர்களுக்கு PPE கிட்களை நன்கொடையாக கொடுத்துள்ளார்.

இதுகுறித்து அவர் தனது பேஸ்புக்கில் வீடியோ ஒன்றை வெளியிட்டுள்ளார். அதில் அவர் கூறியதாவது: கொரோனாவுக்கு எதிரான போரில் நமது மருத்துவர்களின் பணி மிகவும் மகத்தானது. அவர்கள் நமது எல்லையை பாதுகாக்கும் வீரர்களுக்கு இணையானவர்கள். இந்த நிலையில் இந்தப் போரில் ஈடுபட்டிருக்கும் மருத்துவத் துறையைச் சேர்ந்தவர்களுக்கு என்னால் முடிந்த உதவி செய்துள்ளேன் அவர்களுக்காக நான் 1000 PPE கிட்களை அளித்துள்ளேன். இந்தக் கிட்கள் மருத்துவமனையில் உள்ள மருத்துவர்கள் மற்றும் மருத்துவ ஊழியர்களுக்கு நாடு முழுவதும் வழங்கப்படும் என்று அவர் கூறியுள்ளார். இதனையடுத்து வித்யாபாலனுக்கு பாராட்டுக்கள் குவிந்து வருகிறது என்பது குறிப்பிடத்தக்கது.