அஜித் ரசிகர்கள் தாமரையை மலர செய்வார்கள்: தமிழிசை நம்பிக்கை
- IndiaGlitz, [Monday,January 21 2019]
திருப்பூரில் நூற்றுக்கும் மேற்பட்ட அஜித் ரசிகர்கள் பாஜகவில் இணையும் விழாவில் கலந்து கொண்ட தமிழக பாஜக தலைவர் தமிழிசை செளந்திரராஜன், மோடியின் திட்டங்களை அஜித் ரசிகர்கள் மக்களிடம் கொண்டு செல்வார்கள் என்றும், அஜித் ரசிகர்கள் மோடியின் தொண்டர்களாக மாறி தமிழகத்தில் தாமரையை மலரச் செய்வார்கள் என்ற நம்பிக்கை தனக்கு இருப்பதாகவும் கூறியுள்ளார்.
வரும் பாராளுமன்ற தேர்தலில் இதுவரை பாஜகவுடன் எந்த கட்சியும் கூட்டணி வைக்க முன்வரவில்லை. பாஜகவின் ஒரே நம்பிக்கையாக இருந்த அதிமுகவும் பாஜக கூட்டணியில் சேராது என்றே அரசியல் விமர்சகர்கள் கருத்து கூறி வருகின்ரனர்.
இந்த நிலையில் பாஜகவின் ஒரே நம்பிக்கையாக இருந்த ரஜினியும் பாஜகவுக்கு பிடிகொடுக்காமல் நழுவி வருவதால் அஜித்தையும் அவரது ரசிகர்களையும் பயன்படுத்தி கொள்ள பாஜக திட்டமிட்டுள்ளதாக கூறப்படுகிறது
அந்த வகையில் நேற்று திருப்பூரில் பல்வேறு கட்சியில் இருந்து பாஜகவில் சேரும் விழாவில் தமிழிசை செளந்திரராஜன் கலந்து கொண்டார். குறிப்பாக பாஜகவில் சேர்ந்த 100க்கும் மேற்பட்ட அஜித் ரசிகர்களை அவர் புகழ்ந்து பேசினார். திரைத்துறையில் மிகவும் நேர்மையான நடிகர் அஜித் என்றும், அவர் பலருக்கு நல்லதை செய்துள்ளதாகவும், அவரைப் போலவே அவரது ரசிகர்களும் நல்லவர்கள் என்றும் கூறிய் தமிழிசை, இனி மோடியின் திட்டங்களை அஜித் ரசிகர்கள் தான் மக்களிடம் கொண்டு செல்ல வேண்டும் என்றும், அஜித் ரசிகர்கள் மோடியின் தொண்டர்களாக மாறி தமிழகத்தில் தாமரையை மலரச் செய்ய வேண்டும் என்றும் பேசினார். அஜித்தும், அவரது ரசிகர்களும் பாஜகவுக்கு ஆதரவு கொடுப்பார்களா? என்பதை பொறுத்திருந்து பார்ப்போம்