மூன்றாவது முறையும் அஜித்துக்கு 'V'ஐ கொடுப்பாரா சிவா?
- IndiaGlitz, [Saturday,July 09 2016]
அஜித் நடிக்கவுள்ள 'தல 57' படத்தின் பூஜை மிக எளிமையாக சமீபத்தில் நடைபெற்று முடிந்த நிலையில் இந்த படத்தின் படப்பிடிப்பை தொடங்க இயக்குனர் சிறுத்தை சிவா அனைத்து ஏற்பாடுகளையும் தயார் செய்து வருகிறார்.
முதல்கட்ட படப்பிடிப்புக்கு செல்வதற்கு முன்பே இந்த படத்தின் டைட்டில் மற்றும் அஜித் ஜோடியாக நடிக்கும் நடிகை ஆகியவற்றை முடிவு செய்துவிட வேண்டும் என்பதில் அவர் தற்போது தீவிரமாக உள்ளார்.
இந்த படத்தின் நாயகியாக நடிக்க அனுஷ்காவிடம் கால்ஷீட் இல்லாததை அடுத்து காஜல் அகர்வால் நடிக்கவுள்ளது கிட்டத்தட்ட உறுதியாகிவிட்டது. இந்நிலையில் இந்த படத்தின் டைட்டில் குறித்து சிவா தனது உதவியாளர்களுடன் ஆலோசனை செய்து வருகிறார். 'வீரம்', 'வேதாளம்' போலவே இந்த படத்தின் முதல் எழுத்தும் 'V'யில் தொடங்க வேண்டும் என்பதில் சிவா தீவிரமாக உள்ளாராம். 'V'என்றால் வெற்றி என்று கூறும் வகையில் இந்த படமும் வெற்றிப்படமாக அமையும் என்பதே படக்குழுவினர்களின் கருத்தாக உள்ளது.