தமிழ் திரையுலகின் முன்னணி நடிகைகளில் ஒருவரான ஐஸ்வர்யா ராஜேஷ், தடகள வீராங்கனை சாந்தி செளந்தர்ராஜன் என்பவரின் வாழ்க்கை வரலாறு திரைப்படத்தில் நடிக்க இருப்பதாக செய்திகள் வெளிவந்த நிலையில் அந்த படத்தில் தான் நடிக்கவில்லை என்று அவர் மறுப்பு தெரிவித்துள்ளார்.

தமிழகத்தை சேர்ந்த சாந்தி செளந்தர்ராஜன் என்பவர் ஆசிய விளையாட்டு போட்டியில் தடகள பிரிவில் தங்க மெடல் பெற்றவர் என்பது தெரிந்ததே. ஆனால் இதில் பெரும் சர்ச்சை ஏற்பட்டது என்பதும் இந்த சர்ச்சை பரபரப்பை ஏற்படுத்தியது என்பதும் குறிப்பிடத்தக்கது.

இந்த நிலையில் சாந்தி செளந்தர்ராஜன் வாழ்க்கை வரலாறு திரைப்படத்தை ஜெயசீலன் தவப்புதல்வி என்பவர் இயக்க இருப்பதாகவும் இந்த படத்திற்கு ஜிப்ரான் இசையமைக்க இருப்பதாகவும் அறிவிக்கப்பட்டிருந்த நிலையில் இந்த படத்தில் ஐஸ்வர்யா ராஜேஷ், சாந்தி சௌந்தரராஜன் கேரக்டரில் நடிக்க இருப்பதாகவும் தகவல்கள் வெளிவந்தது.

இந்த நிலையில் ஐஸ்வர்யா ராஜேஷ் தரப்பில் இருந்து இந்த தகவலுக்கு மறுப்பு தெரிவிக்கப்பட்டுள்ளது. இதனை அடுத்து சாந்தி சௌந்தரராஜன் படத்தில் ஐஸ்வர்யா ராஜேஷ் நடிக்கவில்லை என்பது உறுதி செய்யப்பட்டுள்ளது.

அப்படி என்றால் சாந்தி செளந்தர்ராஜன் கேரக்டரில் நடிப்பது யார் என்ற கேள்வி எழுந்துள்ள நிலையில் மூன்று புதுமுகங்களில் ஒருவரைத் தேர்வு செய்ய இயக்குனர் ஜெயசீலன் தவப்புதல்வி முடிவு செய்திருப்பதாக கூறப்படுகிறது. இந்த படத்தை 888 புரடொக்சன் நிறுவனம் தயாரிக்க உள்ளது என்பதும், இந்த படத்தில் ஆஸ்கார் நாயகன் ரசூல் பூக்குட்டி ஒலிப்பதிவு பணியை கவனிக்க உள்ளார் என்பதும் குறிப்பிடத்தக்கது.