நடிகர் அஜித் தற்போது ‘விடாமுயற்சி’ படத்தின் படப்பிடிப்பில் உள்ளார் என்பதும் அஜர்பைஜான் நாட்டில் நடந்து வரும் இந்த படப்பிடிப்பில் அதிரடி ஆக்ஷன் காட்சிகள் மற்றும் சில முக்கிய காட்சிகள் படமாக்கி வருவதாகவும் கூறப்படுகிறது.

இந்த படப்பிடிப்பு ஜூலை முதல் வாரம் அல்லது இரண்டாவது வாரம் வரை அஜர்பைஜான் நாட்டில் நடக்கும் என்று எதிர்பார்க்கப்படும் நிலையில் இந்த படப்பிடிப்பை முடித்தவுடன் சென்னை திரும்பவும் அஜித் உடனடியாக ’குட் பேட் அக்லி’ படத்தின் அடுத்த கட்ட படப்பிடிப்பிற்காக தென் ஆப்பிரிக்கா செல்ல உள்ளதாக சுரேஷ் சந்திரா சமீபத்தில் அளித்த பேட்டியில் தெரிவித்துள்ளார்.

தென் ஆப்பிரிக்காவில் 15 முதல் 20 நாட்கள் இந்த படத்தின் படப்பிடிப்பு நடைபெறும் என்றும் இந்த படப்பிடிப்பிற்கு முன்பே சில முக்கிய நட்சத்திரங்கள் இந்த படத்தில் இணைய இருப்பதாகவும் அவர் கூறினார். குறிப்பாக நாயகி, வில்லன் உள்பட முக்கிய நட்சத்திரங்களை அறிவிப்பு வெளியாகும் என்றும் எதிர்பார்க்கப்படுகிறது.

இதுவரை ‘குட் பேட் அக்லி’ படத்தில் அஜித்தின் தனிப்பட்ட காட்சிகள் மட்டும் படமாக்கப்பட்டதாகவும், குறிப்பாக அஜித்தின் அறிமுக பாடல் பிரம்மாண்டமாக படமாக்கப்பட்டதாகவும் அந்த பாடலுக்கு கல்யாண் மாஸ்டர் நடன இயக்குனராக பணிபுரிந்து உள்ளார் அவர் தெரிவித்துள்ளார்.

மேலும் தேவி ஸ்ரீ பிரசாத் இன்னொரு பாடல் கம்போசிங் பணியை முடித்து விட்டதாகவும் அந்த பாடலின் படப்பிடிப்பு தென்னாப்பிரிக்காவில் நடைபெறும் என்றும் கூறப்படுகிறது. மொத்தத்தில் ’விடாமுயற்சி’ மற்றும் குட் பேட் அக்லி’ ஆகிய இரண்டு படங்களின் படப்பிடிப்புகள் விறுவிறுப்பாக நடைபெற்று வருவதை அடுத்து தீபாவளி மற்றும் பொங்கலுக்கு இந்த இரண்டு படங்களும் வெளியாகும் என்பது கிட்டத்தட்ட உறுதி செய்யப்பட்டுள்ளதால் அஜித் ரசிகர்கள் மகிழ்ச்சியில் உள்ளனர்.