தளபதி விஜய் நடித்த ’வாரிசு’ திரைப்படத்தை பிரபல தெலுங்கு இயக்குனர் வம்சி இயக்கியிருந்தார் என்பதும் இந்த படம் வசூல் அளவில் மிகப்பெரிய வரவேற்பை பெற்றது என்பது தெரிந்ததே. இந்த நிலையில் தற்போது அவர் லோகேஷ் கனகராஜ் இயக்கத்தில் ’லியோ’ என்ற படத்தில் நடித்து வரும் நிலையில் இந்த படத்தின் படப்பிடிப்பு இன்னும் ஓரிரு மாதங்களில் முடிந்து விடும் என்று எதிர்பார்க்கப்படுகிறது.

இந்த நிலையில் விஜய்யின் அடுத்த படத்தை இயக்குவது யார் என்ற கேள்வி ரசிகர்கள் மனதில் எழுந்துள்ளது. விஜய்யின் அடுத்த படத்தை அட்லி இயக்குவார் என்றும் இந்த படத்தை சன் பிக்சர்ஸ் நிறுவனம் தயாரிக்கும் என்றும் ஒரு செய்தி வெளியாகி கொண்டிருக்கிறது. அது மட்டும் இன்றி வேறு சில இயக்குனர்கள் விஜய்க்கு கதை கூறி இருப்பதாகவும் அவர்களுக்கு வாய்ப்பு கிடைக்கும் என்று கூறப்படுகிறது.

இந்த நிலையில் பிரபல தெலுங்கு இயக்குனர் கோபிசந்த் விஜய்க்கு கதை கூறியதாகவும் முதல் சந்திப்பிலேயே அந்த கதை அவருக்கு பிடித்து விட்டதால் ஓகே சொல்லி விட்டதாகவும் கூறப்படுகிறது. சமீபத்தில் வெளியான என்.டி.ஆர் பாலகிருஷ்ணாவின் ‘வீரசிம்ஹ ரெட்டி’ என்ற படத்தை இயக்கியவர் இவர் தான் என்பதும் அதற்கு முன் ரவிதேஜா நடித்த ‘கிராக்’ என்ற வெற்றி படத்தை இயக்கியிருந்தார் என்பது குறிப்பிடத்தக்கது.

ஹீரோக்களை மாஸாக காட்டக்கூடிய திறமையுள்ளவர் என்பதால் விஜய்க்கு அவர் பொருத்தமாக இருப்பார் என்றும் கூறப்படுகிறது. இருப்பினும் இந்த படம் குறித்த அதிகாரபூர்வ அறிவிப்பு வெளிவரும் வரை பொறுமை காப்போம்.