கடந்த பத்தாண்டுகளுக்கு முன்பு மார்க்கெட் இழந்த நடிகர், நடிகைகள் மட்டுமே டிவிக்கு வருவார்கள். ஆனால் தற்போது சினிமாவை விட டிவியில் கிடைக்கும் புகழ் அதிகம் என்பதால் இதில் தோன்ற பல நடிகர், நடிகைகள் ஆர்வம் காட்டி வருகின்றனர். ஐம்பது வருடங்களாக சினிமாவில் கிடைத்த புகழை விட பிக்பாஸ் என்ற நிகழ்ச்சியின் மூலம் தனக்கு அதிகளவு புகழ் கிடைத்ததாக கமல்ஹாசன் கூறியுள்ளதே இதற்கு சான்று. மேலும் விஷாலும் விரைவில் ஒரு டிவி நிகழ்ச்சியை தொகுத்து வழங்கவுள்ளார். இதற்கான புரமோஷன் நடந்து வருகிறது

இந்த நிலையில் கமல், விஷாலை அடுத்து பிரபல காமெடி நடிகர் சூரி, டிவி தொடர் ஒன்றில் சிறப்பு தோற்றத்தில் தோன்றவுள்ளார். தனியார் தொலைக்காட்சி ஒன்றில் 'திருமணம்' என்ற டிவி தொடர் ஒன்று ஒளிபரப்பாகவுள்ளது. இந்த தொடரில் நடைபெறும் திருமணம் ஒன்றில் கலந்து கொண்டு மணமக்களை வாழ்த்தி அவர்களுடன் செல்பி எடுத்து கொள்ளும் காட்சியில் சூரி நடித்துள்ளாராம்

'திருமணம்' டிவி தொடரின் இயக்குனர் இதுகுறித்து சூரியிடம் கூறியபோது உடனே நடிக்க ஒப்புக்கொண்டதோடு, சொன்னபடி வந்து சிறப்பாக நடித்து கொடுத்ததாகவும் இயக்குனர் தெரிவித்துள்ளார். இந்த தொடரில் சித்து மற்றும் ஸ்ரேயா முக்கிய வேடங்களில் நடிக்கவுள்ளனர்.