’பொன்னியின் செல்வன்’ திரைப்படத்தின் வெற்றிக்கு பின்னர் நடிகை த்ரிஷா, விஜய், அஜித், கமல்ஹாசன், மோகன்லால் உள்ளிட்ட பிரபலங்களுடன் நடித்துவரும் நிலையில் தற்போது பாலிவுட் பிரபலம் ஒருவருடன் இணைந்து நடிக்க இருப்பதாக தகவல் வெளியாகியுள்ளது.

’பொன்னியின் செல்வன்’ திரைப்படத்தில் குந்தவை என்ற கேரக்டரில் நடித்த த்ரிஷாவுக்கு ஏகப்பட்ட பட வாய்ப்புகள் குவிந்து வருகிறது என்பதை பார்த்து வருகிறோம். விஜய்யுடன் ’லியோ’ திரைப்படத்தில் நடித்த த்ரிஷா தற்போது அஜித் உடன் ’விடாமுயற்சி’ படத்தில் நடித்து வருகிறார். மேலும் கமல்ஹாசன் நடித்து வரும் ’தக்லைஃப்’ என்ற படத்தில் நடித்து வரும் த்ரிஷா, மோகன்லால் நடித்து வரும் ’ராம்’ என்ற படத்தில் நடித்து வருகிறார். மேலும் நிவின்பாலுடன் ‘ஐடெண்டிட்டி’ என்ற படத்தில் த்ரிஷா நடித்து வருகிறார்.

இந்த நிலையில் தற்போது பாலிவுட் பிரபல நடிகர் சல்மான் கான் ஜோடியாக ஒரு படத்தில் நடிக்க இருப்பதாக தகவல் வெளியாகியுள்ளது. அஜித் நடித்த ’பில்லா’ ‘ஆரம்பம்’ உள்ளிட்ட படங்களை இயக்கிய விஷ்ணுவர்தன் இந்த படத்தை இயக்க இருப்பதாகவும் இந்த படத்தின் நாயகியாக நடிக்க த்ரிஷாவிடம் பேச்சுவார்த்தை முடித்து விட்டதாகவும் கூறப்படுகிறது. இந்த படத்தின் முறையான அறிவிப்பு விரைவில் வெளியாகும் என்றும் விரைவில் படப்பிடிப்பு தொடங்கும் என்றும் தெரிகிறது.