சூப்பர் ஸ்டார் ரஜினிகாந்த் நடித்த 'காலா' திரைப்படம் வரும் 7ஆம் தேதி வியாழக்கிழமை உலகம் முழுவதும் பிரமாண்டமாக வெளியாகவுள்ளது. ஆனால் இந்த படத்தை வெளியிட கர்நாடக திரைப்பட வர்த்தக சபை தடை விதித்துள்ளது. இந்த படத்திற்கு சுமார் 10 கன்னட அமைப்புகள் எதிர்ப்பு தெரிவித்துள்ளதால் இந்த படம் தடை செய்யப்பட்டுள்ளது. மேலும் 'காலா' பட விவகாரத்தில் கர்நாடக அரசு தலையிடாது என்று முதல்வர் குமாரசாமி நேற்று தெரிவித்துவிட்டதால் இந்த படம் கர்நாடகத்தில் வெளியாக வாய்ப்பு இல்லை என்றே கருதப்படுகிறது.

இந்த நிலையில் சற்றுமுன் பேட்டியளித்த கர்நாடக திரைப்பட வர்த்தக சபை தலைவர் சாரா கோவிந்த் அவர்கள், 'ரஜினி, கமல் படங்களை தவிர, பிற படங்களை கர்நாடகாவில் வெளியிடுவதற்கு எந்த ஆட்சேபனையும் இல்லை' என்று கூறியுள்ளார். எனவே கமல் நடிப்பில் விரைவில் வெளியாகவுள்ள 'விஸ்வரூபம் 2' படமும் தடை செய்யப்படும் என தெரிகிறது.

கமல்ஹாசன், ரஜினிகாந்த் ஆகிய இருவருமே காவிரி விவகாரத்தில் தமிழகத்திற்கு ஆதரவாக கருத்துக்களை தெரிவித்தவர்கள் என்பதும், கன்னடர்கள் எதிர்த்த காவிரி மேலாண்மை வாரியத்தை அமைத்தே தீரவேண்டும் என்று வலியுறுத்தியவர்கள் என்பதும் குறிப்பிடத்தக்கது.