ஜெயலலிதாவை அடுத்து திரைப்படமாகும் கருணாநிதி வாழ்க்கை வரலாறு திரைப்படம்
- IndiaGlitz, [Saturday,January 04 2020]
மறைந்த முன்னாள் தமிழக முதல்வர் ஜெயலலிதாவின் வாழ்க்கை வரலாறு வெப்சீரீஸ் ‘குயின்’ என்ற பெயரில் தற்போது தொலைக்காட்சிகளில் ஒளிபரப்பாகி வருகிறது. இந்த தொடருக்கு நல்ல வரவேற்பு கிடைத்து வருகிறது என்பது குறிப்பிடத்தக்கது. இதனை அடுத்து இயக்குனர் ஏ.எல்.விஜய் இயக்கி வரும் ’தலைவி’ என்ற திரைப்படமும் ஜெயலலிதாவின் வாழ்க்கை வரலாறு திரைப்படம் என்று கூறப்படுகிறது.
இந்த நிலையில் ஜெயலலிதாவை அடுத்து கருணாநிதியின் வாழ்க்கை வரலாறு திரைப்படம் எடுக்கத் திட்டமிட்டு வருவதாக செய்திகள் வெளியாகி உள்ளது. இது குறித்து இயக்குனர் ராம் சிவா கூறியபோது, ‘அரசியலில் வரலாற்றுச் சாதனை படைத்த கலைஞர் மு.கருணாநிதியின் வாழ்க்கை வரலாற்றை படமாக்க வேண்டும் என்பதே எனது நோக்கம். இந்தப் படத்தில் கலைஞராக அவரது பேரன் உதயநிதி ஸ்டாலினை நடிக்க வைக்கத் திட்டமிட்டுள்ளேன். இது குறித்து அவரிடம் நேர ஒதுக்கீடு பெற்று கட்டாயம் உதயநிதி ஸ்டாலின் மூலம் கலைஞரின் வாழ்க்கை வரலாறு திரைப்படம் எடுக்கப்படும்’ என்று கூறியுள்ளார். இவர் ஏற்கனவே ’என் காதலி சீன் போடுற’ என்ற படத்தை இயக்கியுள்ளார் என்பது குறிப்பிடத்தக்கது.
கருணாநிதியின் வாழ்க்கை வரலாறு படத்தில் உதயநிதி ஸ்டாலின் நடிப்பாரா? என்பதை பொறுத்திருந்து பார்ப்போம்.