இந்தியா மற்றும் சீனா ராணுவ வீரர்களிடையே கால்வான் பள்ளத்தாக்கில் சமீபத்தில் ஏற்பட்ட மோதல் காரணமாக 20 இந்திய ராணுவ வீரர்கள் வீரமரணம் அடைந்தனர். இந்த மோதலை அடுத்து சீனாவுக்கு எதிராக நடவடிக்கை எடுக்கத் தொடங்கிய மத்திய அரசு அதிரடியாக சீனாவின் 59 செயலிகளுக்கு தடை விதித்தது. குறிப்பாக இந்தியாவில் அதிக வாடிக்கையாளர்களைக் கொண்ட டிக்டாக் தடை செய்யப்பட்டதால் டிக்டாக்கின் சீன நிறுவனத்திற்கு ரூ.40,000 கோடி நஷ்டம் ஏற்பட்டதாக கூறப்பட்டது.

இந்தியாவின் பாதுகாப்பு மற்றும் வாடிக்கையாளர்களின் டேட்டாவை திருடுவது ஆகிய காரணங்களால் டிக்டாக் தடை செய்யப்பட்டதாக மத்திய அரசு தரப்பில் கூறப்பட்டது. இந்த நிலையில் இந்தியாவை அடுத்து அமெரிக்கா மற்றும் ஆஸ்திரேலியா நாடுகளும் டிக்டாக்கை தடை செய்ய திட்டமிட்டு வருவதாக வெளிவந்துள்ள செய்தி பெரும் அதிர்ச்சியை ஏற்படுத்தி உள்ளது.

அமெரிக்க அரசின் முக்கிய அதிகாரி ஒருவர் இது குறித்து கருத்து கூறிய போது ’டிக் டாக் செயலி மீது பல புகார்கள் வந்துள்ளதாகவும் தேசிய பாதுகாப்பிற்கு அச்சுறுத்தல் விடுக்கப்பட்டுள்ளதாகவும் இந்த செயலியால் தங்கள் நாட்டின் வாடிக்கையாளர்களின் தகவல்களை சீன அரசு திருடி வருவதாகவும், எனவே டிக்டாக்கை தடை செய்ய ஆலோசிக்கப்பட்டு வருவதாகவும் கூறியுள்ளார்.

அதேபோல் ஆஸ்திரேலிய அரசும் விரைவில் டிக் டாக் செயலியை தடை செய்ய திட்டமிட்டு வருவதாக வெளிவந்துள்ள செய்தி பெரும் பரபரப்பை ஏற்படுத்தியுள்ளது. இந்த தகவலை ஆஸ்திரேலிய எம்பி ஒருவரும் உறுதி செய்துள்ளார் என்பது குறிப்பிடத்தக்கது.

இந்தியாவில் தொடர்ந்து அமெரிக்கா மற்றும் ஆஸ்திரேலியா நாடுகளும் டிக்டாக்கை தடை செய்தால் அதனை அடுத்து பல நாடுகள் இந்த செயலியை தடை செய்யும் வாய்ப்பு இருப்பதாக கூறப்படுவதால் டிக் டாக் செயலிக்கு ஒட்டுமொத்தமாக மூடு விழா நடைபெறும் நாள் வெகு தொலைவில் இல்லை என்றே கருதப்படுகிறது.

கடந்த சில மாதங்களில் டிக் டாக் செயலியை 2 பில்லியன் வாடிக்கையாளர்கள் டவுன்லோட் செய்து உள்ளனர் என்பது குறிப்பிடத்தக்கது.