'மாரி 2' படத்தின் சண்டைக்காட்சியின் படப்பிடிப்பின்போது தனுஷுக்கு காயம் ஏற்பட்டதாகவும், இதனையடுத்து அவர் மருத்துவமனையில் சிகிச்சை பெற்று வருவதாகவும் வெளிவந்த செய்தியினை நேற்று பார்த்தோம். இந்த நிலையில் தனுஷை அடுத்து கோலிவுட்டின் இன்னொரு நடிகரான விஜய்வசந்த்துக்கும் படப்பிடிப்பின்போது விபத்து ஏற்பட்டு காலில் முறிவு ஏற்பட்டுள்ளது.

விஜய் வசந்த் நடிப்பில் ரஞ்சன் இயக்கத்தில் உருவாகிக் கொண்டிருக்கும் படம் “ மை டியர் லிசா. திகில் படமாக உருவாகிக் கொண்டிருக்கும் இந்த படத்தின் படப்பிடிப்பு ஊட்டியில் விறுவிறுப்பாக நடைபெற்று வருகிறது.

இந்த நிலையில் விஜய் வசந்த் ரவுடிகளுடன் மோதும் சண்டைக்காட்சி படமாகிக் கொண்டிருந்தபோது எதிர்பாராதவிதமாக அவரது கால் பள்ளத்தில் சிக்கியதால் தடுமாறி கீழே விழுந்தார். இதனால் அவரது கால் மீது முழு உடம்பும் அழுத்தியதால் கால் முறிந்தது

உடனடியாக ஊட்டியில் உள்ள தனியார் மருத்துவமனையில் அனுமதிக்கப்பட்டு அவருக்கு சிகிச்சை அளிக்கப்பட்டது. விஜய் வசந்த் காலில் முறிவு ஏற்பட்டதை தொடர்ந்து 3 வாரம் சிகிச்சை எடுக்க வேண்டும் என்று மருத்துவர்கள் அறிவுறுத்தப்பட்டதை தொடர்ந்து படப்பிடிப்பு ஒரு மாதம் தள்ளி வைக்கப்பட்டிருப்பதாக படக்குழுவினர் தெரிவித்தனர்.