మెగాస్టార్ చిరంజీవి హీరోగా నటిస్తున్న ‘సైరా న‌ర‌సింహారెడ్డి’ సినిమాలో నటించే లక్కీ ఛాన్స్ కొట్టేసింది తమన్నా. ఈ సినిమాలో నర్తకిగా ఓ కీలక పాత్రలో నటిస్తోంది మిల్కీ బ్యూటీ. భరతనాట్యం నృత్యం ప్ర‌ద‌ర్శిస్తూ.. దేశంలో ఉన్న అన్ని దేవాలయాల్లో హిందూ సంప్రదాయం గురించి చాటి చెబుతూనే.. బ్రిటీషు వారిని ఎదిరించే పాత్రలో కనిపించనుంది త‌మ‌న్నా. ఈ పాత్ర కోసం ప్ర‌త్యేక శిక్ష‌ణ కూడా తీసుకుంటోంది ఈ అమ్మ‌డు. ఇదిలా ఉంటే..

ఈ సినిమాలో త‌మ‌న్నా ఎంట్రీ ప్ర‌త్యేక‌మైన ఆస‌క్తిని క‌లిగిస్తోంది. ఎందుకంటే.. గతంలో రాజమౌళి తెరకెక్కించిన ‘బాహుబలి’ సినిమాలో తమన్నా నటించిన సంగతి తెలిసిందే. ‘బాహుబలి’ షూటింగ్ జూలైలో ప్రారంభమైతే తమన్నా ఎంట్రీ ఏమో డిసెంబర్‌లో జరిగింది. ఇక ‘సైరా’ విషయానికొస్తే.. గత డిసెంబర్‌లో షూటింగ్ ప్రారంభించుకున్న ‘సైరా’ చిత్రం కోసం కూడా.. తమ‌న్నా ఏప్రిల్‌లో ఎంట్రీ ఇచ్చింది. తమ‌న్నా లేట్ ఎంట్రీ ఇచ్చిన ‘బాహుబలి’ ఆమె కెరీర్‌కు ప్ల‌స్ అయిన‌ట్లే.. ‘సైరా’ కూడా ప్ల‌స్ అవుతుందేమో చూడాలి.