ஆர்.கே.நகரில் இரட்டை இலை மற்றும் உதயசூரியனை வீழ்த்திய ராசியான குக்கர் சின்னத்தை பெற டிடிவி தினகரன் சுப்ரீம் கோர்ட் வரை சென்று சட்டப்போராட்டம் நடத்தினார். ஆனால் அவருக்கு இந்த விஷயத்தில் தோல்வியே கிடைத்தது. இருப்பினும் அவரது கட்சி வேட்பாளருக்கு பரிசுப்பெட்டி என்ற பொதுச்சின்னத்தை தேர்தல் ஆணையம் ஒதுக்கியுள்ளது

இந்த நிலையில் மதுரை மக்களவை தொகுதியில் வழக்கறிஞர் பசும்பொன் பாண்டியன் என்பவர் அண்ணா திராவிட மக்கள் முன்னேற்றக் கழகம் என்ற கட்சியின் சார்பில் போட்டியிடுகிறார். அவருக்கு தேர்தல் ஆணையம் குக்கர் சின்னத்தை ஒதுக்கியுள்ளது. இவர்தான் அருப்புக்கோட்டை தனியார் கல்லூரி மாணவிகளை தவறாக வழிநடத்த முயன்றதாக குற்றம் சாட்டப்பட்டிருக்கும் பேராசிரியை நிர்மலாதேவியின் வழக்கறிஞர் என்பது குறிப்பிடத்தக்கது. சுப்ரீம் கோர்ட் சென்றும் பெற முடியாத குக்கரை வழக்கறிஞர் பசும்பொன் பாண்டியன் மிக எளிதாக பெற்றுவிட்டார்.

முன்னதாக குக்கர் சின்னத்தை யாருக்கும் வழங்கக்கூடாது என்று தேர்தல் ஆணையத்திடம் டிடிவி தினகரன் தரப்பில் கோரிக்கை வைக்கப்பட்டிருந்தது. இந்த கோரிக்கை நிராகரிக்கப்பட்டு, குக்கர் சின்னம் சுயேட்சை வேட்பாளர்களுக்கு ஒதுக்கப்பட்டு வருகிறது என்பது குறிப்பிடத்தக்கது