மதுரை மாவட்டம் தே.கல்லுப்பட்டி பகுதியை சேர்ந்த அதிமுக தொண்டர் பழனிசாமி(57). இவர் சந்தையூர் வாக்குச்சாவடிக்கு தன்னை முகவர் பணிக்கு சேர்த்துக் கொள்ளுமாறு அங்குள்ள அதிமுக கட்சி நிர்வாகிகளிடம் கோரிக்கை வைத்து வந்ததாகக் கூறப்படுகிறது. இதுதொடர்பாக கட்சி நிர்வாகிகளிடம் பழனிசாமி தகராறும் செய்துள்ளார்.

ஆனால் இறுதிவரை இவரை முகவர் பணிக்கு கட்சி நிர்வாகம் சேர்த்துக் கொள்ளாததை அடுத்து கடந்த 14 ஆம் தேதி பழனிசாமி டி.குன்னத்தூர் பகுதியில் அமைந்துள்ள மறைந்த முதல்வர் செல்வி ஜெயலலிதா கோவில் முன்பு தீக்குளித்து தற்கொலைக்கு முயற்சித்து இருக்கிறார். மேலும் கடுமையான காயத்தடன் கோவிலில் மயங்கி விழுந்தும் இருக்கிறார். இதைப் பார்த்த கட்சி நிர்வாகிகள் பழனிசாமியை ராஜாஜி மருத்துவமனையில் அனுமதித்து உள்ளனர்.

இதையடுத்து பழனிசாமிக்கு கடந்த சில தினங்களாக தீவிரச் சிகிச்சை அளிக்கப்பட்டு வந்துள்ளது. ஆனால் தற்போது அவர் சிகிச்சை பலனின்றி உயிரிழந்து விட்டதாகத் தகவல் வெளியாகி உள்ளது. இந்நிலையில் தே.கல்லுபட்டி போலீசார் இதை வழக்காகப் பதிவு செய்து விசாரணை செய்து வருகின்றனர். இச்சம்பவம் அதிமுக தொண்டர்கள் மற்றும் நிர்வாகிககள் மத்தியில் கடும் பரபரப்பை ஏற்படுத்தி உள்ளது.