'சொடக்கு' பாடலுக்கு தடை கோரி அதிமுக நிர்வாகி புகார்!
- IndiaGlitz, [Friday,January 05 2018]
சூர்யா நடிப்பில் விக்னேஷ் சிவன் இயக்கத்தில் உருவாகியுள்ள 'தானா சேர்ந்த கூட்டம் திரைப்படத்தின் பாடல்கள் நேற்று வெளியாகியுள்ள நிலையில் இந்த படத்தில் இடம்பெற்றுள்ள சூப்பர் ஹிட் பாடலான 'சொடக்கு மேல சொடக்கு போட்டு' என்ற பாடலுக்கு தடைகேட்டு அதிமுக நிர்வாகி ஒருவர் சென்னை காவல் ஆணையர் அலுவலகத்தில் புகார் அளித்துள்ளார்.
சொடக்கு பாடல் இளைஞர்களிடயை வன்முறையை தூண்டும் வகையில் இடம் பெற்றுள்ளதால் இந்த பாடலுக்கு தடை விதிக்க வேண்டும் என்று அதிமுக நிர்வாகி சதீஷ்குமார் என்பவர் புகார் அளித்துள்ளார். மேலும் இந்த பாடலை கம்போஸ் செய்த இசையமைப்பாளர், படத்தயாரிப்பாளர் உள்ளிட்டோர் மீது நடவடிக்கை எடுக்க வேண்டும் என்றும் அவர் தனது புகாரில் தெரிவித்துள்ளார்
இந்த பாடலில் 'கரைவேட்டி, வெள்ளைச்சட்டை போட்டவனைப் பாத்தா வெரட்டி வெரட்டி வெளுக்கத் தோணுதுன்னு' என்ற வரி உள்ளது. இந்த வரிக்கு ஏற்கனவே ஒருசிலர் எதிர்ப்பு தெரிவித்திருந்த நிலையில் தற்போது அதிமுக நிர்வாகி புகார் கொடுத்துள்ளார் என்பது குறிப்பிடத்தக்கது.