Soyam Bapurao:ఇంటికి, కొడుకు పెళ్లికి ఎంపీ లాడ్స్ డబ్బు వాడుకున్నా.. తప్పేంటీ : ఎంపీ బాపూరావు వ్యాఖ్యలు వైరల్
- IndiaGlitz, [Tuesday,June 20 2023]
మనసులో ఏది దాచుకోకుండా తరచూ వివాదాస్పద వ్యాఖ్యలు చేసే బీజేపీ నేత, ఆదిలాబాద్ ఎంపీ సోయం బాపూరావు సంచలన వ్యాఖ్యలు చేశారు. కేంద్ర ప్రభుత్వం నియోజకవర్గాల అభివృద్ధికి కేటాయించే ఎంపీ లాడ్స్ నిధులను ఆయన సొంతానికి వాడుకున్నారు. ఆ విషయం గుట్టుగా వుంచకుండా తనను తానే స్వయంగా ప్రకటించారు బాపూరావు. ఇటీవల తన నివాసంలో పార్టీ ఎంపీటీసీలు, కౌన్సిలర్లతో తన నివాసంలో ఆయన సమావేశం నిర్వహించారు. ఈ నేపథ్యంలో ఎంపీ లాడ్స్ నిధులను తన అవసరాలకు వాడుకున్నానని బాపూరావు సంచలన వ్యాఖ్యలు చేశారు. అలా వాడుకుంటే తప్పేంటీ అని ఆయన ప్రశ్నించారు. తన ఇంటి నిర్మాణం, తన కుమారుడి పెళ్లి కోసం వాడుకున్నానని సోయం బాపూరావు తెలిపారు.
ప్రతీ పైసా తీర్చేశా :
ఎందరో ఎంపీలు లాడ్స్ నిధుల్ని ఇష్టానుసారంగా వాడుకుంటునున్నారని.. తాను కూడా అలాగే వాడుకుంటున్నానని ఎంపీ చెప్పారు. కానీ వాడిన ప్రతీ రూపాయిని లబ్ధిదారులకు ఇచ్చేస్తున్నానని సోయం బాపూరావు వెల్లడించారు. ఇంటి నిర్మాణం, తన కుమారుడి వివాహం కోసం సమయానికి డబ్బులు అందలేదని .. అందుకే ఎంపీ లాడ్స్ నిధుల్ని వాడుకున్నానని ఎంపీ తెలిపారు. అయితే తీసుకున్న సొమ్మును.. రూపాయితో సహా తీరుస్తున్నానని సోయం బాపూరావు చెప్పిన మాటలకు అక్కడున్న వారు చప్పట్లతో అభినందించారు. అయితే ఆలస్యంగా వెలుగులోకి వచ్చిన ఈ వీడియో ప్రస్తుతం సోషల్ మీడియాలో వైరల్ అయ్యింది.