நடிகை சமந்தா கடந்த சில நாட்களுக்கு முன்னர் தான் அரியவகை நோயான மயோசிட்டிஸ் என்ற நோயால் பாதிக்கப்பட்டு இருப்பதாகவும் அந்த நோய்க்காக சிகிச்சை எடுத்துக் கொண்டு இருப்பதாகவும் தெரிவித்திருந்தார். அவரது உடல்நிலை தற்போது தேறி வருவதாக கூறப்பட்டாலும் அவர் புதிய படங்களில் நடிக்க ஒப்புக் கொள்ளவில்லை என்றும் ஏற்கனவே ஒப்புக் கொண்ட படங்களை மட்டும் முடித்து விட்டு சினிமாவுக்கு ஒரு நீண்ட இடைவெளி விட திட்டமிட்டிருப்பதாகவும் கூறப்படுகிறது.

விஜய் தேவரகொண்டாவுடன் சமந்தா நடித்து வரும் ’குஷி’ என்ற படத்தை மட்டும் அவர் முடித்து விடுவார் என்றும் அவர் நடிக்க இருந்த ‘பேமிலிமேன் 2’ படத்தில் இருந்து அவர் விலகிவிட்டதாகவும் கூறப்படுகிறது. நடிகை சமந்தா ஒரு சில ஆண்டுகள் முழுமையாக ஓய்வு எடுத்து தனது உடல் நலத்தை கவனிப்பார் என்றும் கூறப்படுகிறது.

இந்த நிலையில் சமந்தா முழுவதுமாக சினிலாவில் இருந்து விலகப்போகிறார் என்று சமூக வலைதளங்களில் பரவி வரும் வதந்திக்கு சமந்தாவின் தரப்பினர் மறுப்பு தெரிவித்துள்ளனர். சமந்தா ஒரு இடைவெளிக்கு பின் மீண்டும் புத்துணர்ச்சியுடன் திரை உலகிற்கு வருவார் என்றும் அவருக்கான இடம் திரையுலகில் எப்போதுமே இருக்கும் என்றும் கூறிவருகின்றனர்.

இந்த நிலையில் சமீபத்தில் வெளியான சமந்தா நடித்த ’யசோதா’ திரைப்படம் மிகப் பெரிய வெற்றி பெற்றது என்பதும் இந்த படம் அனைத்து தரப்புக்கும் நல்ல லாபத்தைக் கொடுத்துள்ளது என்பது குறிப்பிடத்தக்கது. மேலும் சமந்தா நடித்து முடித்த ’சாகுந்தலம்’ என்ற திரைப்படம் விரைவில் வெளியாக உள்ளது என்பது குறிப்பிடத்தக்கது.