நடிகை ரேகா நாயர் கார் மோதியதால் ஒருவர் பலியாகி உள்ள நிலையில் அவர் கைதாக வாய்ப்பு இருக்கிறதா என்ற கேள்வி எழுப்பப்பட்டு வருகிறது.

இதுகுறித்து ரேகா நாயரிடம் விசாரணை செய்தபோது, ‘காரை தான் ஓட்டி செல்லவில்லை என்றும் தனது கார் ஓட்டுநர் பாண்டி என்பவர் தான் காரை ஓட்டிச் சென்றார் என்றும் மெக்கானிக் கடையிலிருந்து வீட்டிற்கு காரை கொண்டு வரும்போது தான் இந்த விபத்து நடந்திருக்கிறது என்றும் நான் அவருக்கு முன்னரே இருசக்கர வாகனத்தில் சென்றேன்’ என்றும் ரேகா நாயர் கூறியுள்ளார்..

மேலும் விபத்து நிகழ்ந்த உடன் பொதுமக்கள் கூடியதால் அதை கண்டு இறங்கி பார்த்த போது தான் ஒருவர் படுகாயம் அடைந்தது தெரிய வந்தது என்றும் இறந்த நபர் மது போதையில் இருந்ததாக போலீசார் தெரிவித்துள்ளார் என்றும் ரேகா நாயர் தெரிவித்துள்ளார்.

சிசிடிவி காட்சியை பார்த்தால் தான் எப்படி விழுந்தார் என்பது குறித்து தெரிய வரும் என்றும் நான் காரை ஓட்டவில்லை எனது ஓட்டுநர் தான் காரை ஓட்டினார் அதற்கான ஆதாரங்களை போலீசாரிடம் அளித்துள்ளேன் என்றும் இந்த விபத்து குறித்து ரேகா நாயர் கூறியுள்ளார்

இந்த விபத்து குறித்து போலீசார் நடத்திய முதற்கட்ட விசாரணையில் விபத்தை ஏற்படுத்தியது எம்.ஜி.ஆர் நகர் டி.வி.கே தெருவை சேர்ந்த பாண்டி என்ற டிரைவர் என்பதும், இவர் நடிகை ரேகா நாயரிடம் கார் ஓட்டுநராக பணிபுரிந்து வருவதும் தெரியவந்ததாக கூறப்படுகிறாது. இதையடுத்து பாண்டி கைது செய்யப்பட்டதாகவும், அவரிடம் தொடர்ந்து விசாரணை நடைபெற்று வருகிறது என்றும் போலீசார் தெரிவித்துள்ளனர்.