சூர்யாவின் 'எஸ் 3' படத்தில் இணைந்த பிரபல நடிகை
- IndiaGlitz, [Saturday,August 27 2016]
எந்தவித கதாபாத்திரம் கொடுத்தாலும் அந்த கதாபாத்திரமாகவே மாறிவிடும் ஒருசில நடிகைகளில் ஒருவர் ராதிகா. கலைத்துறையின் பரம்பரையில் இருந்து வந்ததால் அவருடைய ரத்தத்திலேயே நடிப்பு கலந்துள்ளது என கூறலாம்.
சமிபகாலமாக அவர் ஹீரோக்களின் அம்மா வேடத்தில் வெகு இயல்பாக நடித்து பாராட்டுக்களை பெற்று வருகிறார். விஜய்க்கு அம்மாவாக 'தெறி', விஜய்சேதுபதிக்கு அம்மாவாக 'நானும் ரவுடிதான், தர்மதுரை, தங்கமகன்' படத்தில் தனுஷூக்கு அம்மாவாக என பல படங்களில் தன்னுடைய திறமையை மீண்டும் மீண்டும் நிரூபித்து வரும் ராதிகா தற்போது ஸ்ருதிஹாசனுக்கும் அம்மாவாக நடிக்கவுள்ளார்.
சூர்யா நடிப்பில் ஹரி இயக்கி வரும் 'எஸ் 3' படத்தில் ஸ்ருதிஹாசன் மிக முக்கிய வேடத்தில் நடித்துள்ளார் என்பது தெரிந்ததே. இந்நிலையில் ஸ்ருதிக்கு அம்மாவாக ராதிகா நடிக்கவுள்ளதாகவும், அவர் சம்பந்தப்பட்ட காட்சியின் படப்பிடிப்பு மிக விரைவில் நடைபெறும் என்றும் கூறப்படுகிறது. ஏற்கனவே ஹரி இயக்கத்தில் ஸ்ருதிஹாசன் நடித்த 'பூஜை' படத்தில் விஷாலுக்கு அம்மாவாக ராதிகா நடித்துள்ளார் என்பது குறிப்பிடத்தக்கது.