அன்புச்செழியனை கெட்ட வார்த்தையால் திட்டியது ஏன்? பூர்ணா விளக்கம்
- IndiaGlitz, [Tuesday,November 28 2017]
நடிகர் சசிகுமாரின் உறவினர் அசோக்குமாரின் தற்கொலைக்கு காரணமானவர் என்று காவல்துறையினர்களால் தேடப்பட்டு வரும் பைனான்சியர் அன்புச்செழியனுக்கு திரையுலகில் ஆதரவும் எதிர்ப்பும் மாறி மாறி கிடைத்து வருகிறது.
கலைப்புலி எஸ்.தாணு, விஜய் ஆண்டனி, சீனுராமசாமி, தேவயானி, சுந்தர் சி உள்பட பலர் அன்புச்செழியனுக்கு ஆதரவு தெரிவித்துள்ள நிலையில் அமீர் உள்பட ஒருசிலர் அன்புச்செழியனுக்கு எதிராக கருத்து கூறி வருகின்றனர்.
இந்த நிலையில் சசிகுமாரின் 'கொடி வீரன்' படத்தின் நாயகிகளில் ஒருவரான பூர்ணா தனது சமூக வலைத்தள பக்கத்தில் அன்புச்செழியனுக்கு கடுமையான தண்டனை பெற்றுத்தர வேண்டும் என்று கூறியுள்ளார். மேலும் அவர் தனது டுவிட்டரில் ஒரு கெட்ட வார்த்தையையும் பயன்படுத்தியிருந்தார்
இந்த வார்த்தை சர்ச்சையை ஏற்படுத்தியுள்ள நிலையில் இதுகுறித்து நடிகை பூர்ணா தற்போது விளக்கம் அளித்துள்ளார். 'எனக்கு அன்புச்செழியனை தனிப்பட்ட முறையில் யார் என்றே தெரியாது. ஆனால் நானும் அசோக்குமாரும் ஒன்றாக பணியாற்றியுள்ளோம். அசோக் குமாரின் திடீர் மரணம் என்னை பெரிதும் பாதித்துவிட்டது. அவரது இறுதிச்சடங்கில் நான் கலந்து கொண்டேன். அப்போது அவரது குடும்பத்தினர்களை பார்த்து கவலை அடைந்தேன். அந்த கோபத்தின் வெளிப்பாடாகத்தான் அந்த வார்த்தையை பயன்படுத்தினேனே தவிர சர்ச்சையை ஏற்படுத்த வேண்டும் என்பது எனது நோக்கமல்ல' என்று பூர்ணா கூறியுள்ளார்.