நடிகை நக்மாவின் வங்கிக்கணக்கில் ரூ.1 லட்சம் மோசடி.. அதிர்ஷ்டவசமாக தப்பித்த பெரும் தொகை..!
- IndiaGlitz, [Thursday,March 09 2023]
நடிகை நக்மாவின் வங்கி கணக்கில் இருந்து மோசடி நபர் ஒருவர் சுமார் ஒரு லட்ச ரூபாய் எடுத்துவிட்டதாகவும் ஆனால் நக்மா சுதாரித்துக் கொண்டதை அடுத்து பெரும் தொகை தப்பியதாகவும் தகவல்கள் வெளியாகி உள்ளன.
சூப்பர் ஸ்டார் ரஜினிகாந்த் நடித்த ’பாட்ஷா’ உள்பட பல தமிழ் திரைப்படங்களிலும் தெலுங்கு மற்றும் ஹிந்தி படங்களிலும் நடித்தவர் நடிகை நக்மா. தற்போது இவர் காங்கிரஸ் கட்சியின் முக்கிய நிர்வாகியாக உள்ளார் என்பதும் கடந்து சில ஆண்டுகளாக அவர் தீவிர அரசியலில் இறங்கியுள்ளார் என்பது தெரிந்ததே.
இந்த நிலையில் நடிகை நக்மாவுக்கு மர்ம நபர் ஒருவர் போனில் பேசி ரூபாய் ஒரு லட்சம் வரை மோசடி செய்த சம்பவம் பரபரப்பை ஏற்படுத்தி உள்ளது. வங்கி கணக்கின் கேஒய்சி விவரங்களை அப்டேட் செய்ய வேண்டும் என வங்கியின் பெயரிலிருந்து நடிகை நக்மாவின் மொபைல்போனுக்கு ஒரு லிங்க் வந்ததாகவும் அந்த லிங்கை கிளிக் செய்ய வேண்டும் என மெசேஜ் வந்ததாகவும் தெரிகிறது.
நடிகை நக்மா அந்த லிங்கை கிளிக் செய்தவுடன் வங்கிய அதிகாரி போல் பேசிய ஒருவர் கேஒய்சி விபரங்களை அப்டேட் செய்ய தான் உதவுவதாக தெரிவித்துள்ளார். இந்த நிலையில் நடிகை நக்மா எந்தவிதமான ஓடிபியையும் பகிர்ந்து கொள்ளாத நிலையில் திடீரென அவரது செல்போனை தனது கட்டுப்பாட்டுகள் எடுத்துக் கொண்ட அந்த மர்ம நபர் ரூபாய் 99,998 தொகையை வேறு ஒரு வங்கி கணக்கிற்கு மாற்றியதாக தெரிகிறது.
இதனை அடுத்து தனது மொபைல் போனுக்கு 20க்கும் மேற்பட்ட ஓடிபிகள் வந்ததாகவும் ஆனால் அதை தான் பகிரவில்லை என்பதால் பெரும் தொகை தப்பித்தது என்றும் அவர் தெரிவித்துள்ளார். இது குறித்து மும்பை சைபர் கிரைம் காவல்துறையில் நடிகை நக்மா புகார் அளித்துள்ளதாகவும் இந்த புகாரின் அடிப்படையில் காவல்துறையினர் வழக்கு பதிவு செய்து விசாரணை செய்து மர்ம நபரை தேடி வருவதாகவும் தகவல்கள் வெளியாகி உள்ளன.
கடந்த சில நாட்களுக்கு முன்னர் தான் நடிகை ஸ்வேதா மேனன் உள்பட சுமார் 80 பேர்களின் வங்கி கணக்குகளில் இருந்து பல லட்ச ரூபாய் மோசடி செய்த கும்பல் குறித்த செய்தி வெளியான நிலையில் தற்போது நக்மாவின் வங்கிக் கணக்கிலிருந்தும் சுமார் ஒரு லட்ச ரூபாய் மோசடி செய்யப்பட்டிருப்பது பெரும் அதிர்ச்சியை ஏற்படுத்தி உள்ளது.