கடந்த சில நாட்களாக ஸ்ரீலீக்ஸ் என்ற பெயரில் தெலுங்கு திரையுலகை கதிகலக்கி கொண்டிருக்கும் நடிகை ஸ்ரீரெட்டி. தெலுங்கு திரையுலகில் இவருக்கு ஆதரவாகவும் எதிராகவும் பலர் குரல் கொடுத்து வருகின்றனர். 

இந்த நிலையில் சமீபத்தில் பவன்கல்யாண் குறித்து சர்ச்சைக்குரிய கருத்தை தெரிவித்த ஸ்ரீரெட்டி, தன்னைத்தானே செருப்பால் அடித்து கொண்டது பெரும் பரபரப்பை ஏற்படுத்தியது. இந்த நிலையில் பவன்கல்யாணுக்கு ஆதரவாகவும், ஸ்ரீரெட்டிக்கு எதிராகவும் நடிகை மாதவி லதா தெலுங்கு பிலிம் சேம்பர் முன் தனது ஆதரவாளர்களுடன் போராட்டம் நடத்தினார். இவர் விஷால் நடித்த 'ஆம்பள' படத்தில் நடித்தவர் என்பது குறிப்பிடத்தக்கது.

போராட்டம் நடத்திய மாதவி லதாவை கலைந்து செல்லும்படி போலீசார் எச்சரித்தனர். ஆனால் எச்சரிக்கையை மீறி மாதவி லதா போராட்டத்தை தொடர்ந்ததால் அவரை போலீசார் கைது செய்தனர். இதுவரை சிறையை பார்த்ததில்லை என்றும் செல்போனுக்கு கூட அனுமதியில்லாத சிறையில் இருந்தது புதிய அனுபவமாக இருந்ததாகவும் மாதவி லதா கூறியுள்ளார்.