நடிகை கஸ்தூரி ஐதராபாத்தில் கைது.. நீதிமன்றத்தில் ஆஜர் செய்யப்படுவது எப்போது?
- IndiaGlitz, [Sunday,November 17 2024]
நடிகை கஸ்தூரி கடந்த சில நாட்களாக தலைமறைவாக இருந்த நிலையில், நேற்று அவர் ஹைதராபாத்தில் கைது செய்யப்பட்டதாகவும், இதையடுத்து அவர் இன்று நீதிபதி முன் ஆஜர் செய்யப்பட வாய்ப்பு இருப்பதாகவும் கூறப்படுகிறது.
கடந்த மூன்றாம் தேதி சென்னையில் இந்து மக்கள் கட்சி நடத்திய ஆர்ப்பாட்டத்தில் நடிகை கஸ்தூரி கலந்து கொண்டு தெலுங்கு பேசும் மக்கள் குறித்து சர்ச்சைக்குரிய வகையில் பேசியதாக அவர் மீது குற்றம் சாட்டப்பட்டது. இதையடுத்து தமிழகம் முழுவதும் பல காவல் நிலையங்களில் அவர் மீது புகார் அளிக்கப்பட்ட நிலையில், நான்கு பிரிவுகளின் பேரில் போலீசார் வழக்கு பதிவு செய்தனர்.
இந்த நிலையில், சென்னை எழும்பூர் போலீசார் கஸ்தூரியிடம் விசாரணை செய்யச் சென்றபோது, அவர் வீட்டில் இல்லை என்றும், தலைமறைவாகிவிட்டதாக தெரியவந்தது. இதனிடையே மதுரை உயர்நீதிமன்றத்தில் நடிகை கஸ்தூரி தாக்கல் செய்த முன்ஜாமீன் மனு தள்ளுபடி செய்யப்பட்டதை அடுத்து, அவரை போலீசார் கைது செய்ய தீவிர நடவடிக்கை எடுத்து வந்தனர்.
இந்த நிலையில், ஹைதராபாத்தில் நடிகை கஸ்தூரி இருப்பதாக போலீசாருக்கு ரகசிய தகவல் கிடைத்த நிலையில், தனிப்படை போலீசார் ஹைதராபாத் சென்று அவரை கைது செய்தனர். இதற்குப் பிறகு, அவர் சென்னை அழைத்து வரப்பட இருப்பதாகவும், இன்று நீதிபதி முன் ஆஜர் படுத்தப்பட இருப்பதாகவும் கூறப்படுகிறது.