விஜய் டிவியில் ஒளிபரப்பாகி வரும் ‘குக் வித் கோமாளி சீசன் 2 மிகப்பெரிய வரவேற்பை பெற்றுள்ளது என்பதும் சீசன் 1ஐவிட சிசன் 2 இரு மடங்குக்கும் மேலாக வரவேற்பை பெற்றுள்ளது என்பதும் குறிப்பாக பிக்பாஸ் நிகழ்ச்சி விட இந்த நிகழ்ச்சிக்கு தான் ரசிகர்கள் அதிகம் என்ற கருத்து கணிப்பு கூட வெளிவந்துள்ளது என்பது குறிப்பிடத்தக்கது.

இந்த நிலையில் சீசன் 3 நிகழ்ச்சியில் கலந்து கொள்ள குக்’களுக்கும், கோமாளிகளுக்கும் மிகப்பெரிய அளவில் போட்டி இருக்கும் என்று எதிர்பார்க்கப்படுகிறது. இந்த நிலையில் விஜய் உள்பட முன்னணி நடிகர்களுடன் நடித்த நடிகை ஒருவர் குக் வித் கோமாளி சீசன் 3 இல் வாய்ப்பு கிடைத்தால் செல்ல மாட்டேன் என்று கூறியுள்ளார்.

’சிவா மனசுல சக்தி’ என்ற திரைப்படத்தின் மூலம் அறிமுகமாகி ’மதுரை சம்பவம்’ ’நகரம்’ ’நண்பன்’ உள்ளிட்ட பல திரைப்படங்களில் நடித்தவர் நடிகை அனுயா. இவர் பிக் பாஸ் சீசன் 1 நிகழ்ச்சியில் கலந்து கொண்டார் என்பதும் அந்த நிகழ்ச்சியில் இருந்து ஒரே வாரத்தில் வெளியேறினார் என்பதும் குறிப்பிடத்தக்கது.

இந்த நிலையில் சமீபத்தில் அளித்த பேட்டியில் ‘குக் வித் கோமாளி சீசன் 3 நிகழ்ச்சியில் எனக்கு அழைப்பு விடுத்தால் நான் சொல்ல மாட்டேன் என்றும் ஏனெனில் அந்த நிகழ்ச்சியில் கலந்து கொள்ள வேண்டுமானால் தமிழ் நன்றாக தெரிய வேண்டும் என்றும் தமிழில் நன்றாக ஜோக் சொல்ல வேண்டும் என்றும் எனக்கு தமிழ் சரியாக தெரியாது என்பதால் அந்த நிகழ்ச்சிகளில் கலந்து கொள்ள மாட்டேன் என்றும் அவர் தெரிவித்துள்ளார்.