முத்து நகரா? மூச்சு திணறும் நகரா? ஸ்டெர்லைட் குறித்து பிரபல நடிகர்
- IndiaGlitz, [Monday,March 26 2018]
ஸ்டெர்லைட் தொழிற்சாலையை மூட வேண்டும் என்று தூத்துக்குடி பகுதி மக்கள் கடந்த பல ஆண்டுகளாக போராடி வருகின்றனர். இந்த நிலையில் இந்த ஆலையின் ஒப்பந்தம் அடுத்த ஆண்டோடு முடிகிறது. ஆனால் மத்திய அரசு இந்த ஆலையின் ஒப்பந்தத்தை நீடித்ததோடு, புதிய ஆலைக்கும் அனுமதி கொடுத்துள்ளது.
இதனால் அதிர்ச்சி அடைந்த தூத்துக்குடி பகுதி மக்கள் கடந்த சில நாட்களாக தீவிரமாக போராட்டம் நடத்தி வருகின்றனர். இந்த போராட்டத்திற்கு தற்போது கல்லூரி மாணவர்களும் ஆதரவு கொடுத்துள்ளதால் இந்த போராட்டம் ஒரு மினி மெரீனா போராட்டம் போல் மாறியுள்ளது. மேலும் பல்வேறு அரசியல் கட்சி தலைவர்களும் இந்த போராட்டத்திற்கு தங்கள் ஆதரவை தெரிவித்துள்ளனர்.
இந்த நிலையில் சுற்றுச்சுழல் குறித்து அவ்வப்போது பொதுமக்களிடம் விழிப்புணர்வு ஏற்படுத்தி தமிழகம் முழுவதும் லட்சக்கணக்கான மரக்கன்றுகளை நட்டு வைத்து கொண்டிருக்கும் நடிகர் விவேக், ஸ்டெர்லைட் ஆலை குறித்து தனது சமூக வலைத்தளத்தில் கூறியதாவது: ஸ்டெர்லைட் பற்றி படிக்கப் படிக்க அதிர்ச்சியாக உள்ளது. எவ்வளவு உயிர் கொல்லி நச்சுக் கழிவுகள் மண்ணிலும் நீரிலும் காற்றிலும் இதுவரை கலந்தனவோ தெரியவில்லையே? அரசு கருணை மனம் கொண்டு நடவடிக்கை எடுக்க வேண்டுமாய் மன்றாடி கேட்கிறேன். அது முத்து நகர்; மூச்சுத் திணறும் நகர் அல்ல' என்று கூறியுள்ளார். விவேக்கின் இந்த பதிவுக்கு நெட்டிசன்கள் அவருக்கு பாராட்டு தெரிவித்து வருகின்றனர்.