தமிழகத்தில் உள்ள ரயில் நிலையங்கள், பேருந்து நிலையங்களில் ஒலிபரப்பப்படும் அறிவிப்புகள் தமிழிலும் இருக்கும் நிலையில் விமான நிலையத்தில் மட்டும் தமிழ் அறிவிப்புகள் இல்லை என்ற குறை பல வருடங்களாக விமான பயணிகளுக்கு இருந்து வருகிறது. இதுகுறித்து பலமுறை விமான நிறுவனங்களுக்கு அறிவுறுத்தியும் கண்டுகொள்ளப்படாமல் உள்ளது.

இந்த ஆதங்கத்தை தற்போது நடிகர் விவேக் அவர்களும் தனது சமூக வலைத்தளத்தில் தெரிவித்துள்ளார். அவர் தனது சமூக வலைத்தளத்தில், 'இண்டிகோ கோவை சென்னை விமானத்தில் உழைப்பால் உயர்ந்த வணிக மக்கள் பயணம் செய்கின்றனர். அறிவிப்புகள் தமிழில் இருப்பின் நலம் என்று பதிவு செய்துள்ளார். மேலும் இன்னொரு பதிவில், 'தமிழ்நாட்டுக்குள் அத்தனை விமானசேவையிலும், தமிழிலும் அறிவிப்பு இருத்தல் நலம். தமிழ் அறிவிப்பு இருந்தால் இந்தி மற்றும் ஆங்கிலம் புரியாத பயணிகளுக்கு வசதியாக இருக்கும்' என்று அவர் கூறியுள்ளார்.

விவேக்கின் இந்த சமூக வலைத்தள பதிவுக்கு நல்ல வரவேற்பு கிடைத்துள்ளது. தொடர்ந்து அனைவரும் இதுகுறித்து வலியுறுத்தி வந்தால் விமான நிலையத்திலும் விரைவில் தமிழ் ஒலிக்கும் என்பது குறிப்பிடத்தக்கது.

தமிழ்நாட்டுக்குள் அத்தனை விமானசேவையிலும்,தமிழிலும் அறிவிப்பு இருத்தல்,நலம்.4 the convenience of people who can't u.stand Hindi &English

— Vivekh actor (@Actor_Vivek) August 12, 2017