சூர்யாவுக்கு 'காக்க காக்க' படமும், அருண்விஜய்க்கு 'தடையற தாக்க' படமும் கொடுத்த திருப்புமுனையை இளையதளபதி விஜய்யின் உறவினரான விக்ராந்துக்கு 'தாக்க தாக்க' படம் கொடுக்குமா? என்ற எதிர்பார்ப்பில் அனைவரும் காத்திருக்கும் நிலையில் இந்த படம் வரும் 31ஆம் தேதி ரிலீஸ் ஆகவுள்ளது.

விக்ராந்த், லீமா, அரவிந்த் சிங், ராகுல் வெங்கட், அபிநயா, பார்வதி நிர்பன் உள்பட பலர் நடித்து வரும் இந்த படத்தை சஞ்சீவ் இயக்கியுள்ளார். இவர் விக்ராந்தின் சகோதரர் என்பது குறிப்பிடத்தக்கது.

சமீபத்தில் இந்த படத்தின் புரமோஷனுக்காக விஷால், ஆர்யா, விஷ்ணு இணைந்த பாடல் காட்சி ஒன்று வெளியாகி, இணையதளங்களில் சூப்பர் ஹிட் ஆகியது. மூவருமே விக்ராந்தின் நெருங்கிய நண்பர்கள் என்பது குறிப்பிடத்தக்கது.

இந்த படத்தின் ரிலீஸ் உரிமையை கலைப்புலி எஸ்.தாணு பெற்றிருப்பதால், அவர் மிகச்சிறந்த முறையில் விளம்பரம் செய்து இந்த படத்தை வெற்றிப்படமாக்கிவிடுவார் என விக்ராந்த் உள்பட படக்குழுவினர் அனைவரும் நம்பிக்கை தெரிவித்துள்ளனர். இந்த படத்தை அடுத்து விக்ராந்த், உதயநிதி ஸ்டாலின் நடித்து வரும் 'கெத்து' படத்தில் வில்லனாக நடித்து வருகிறார் என்பது குறிப்பிடத்தக்கது.