நடிகர் வடிவேலுவின் தாயார் கடந்த சில மாதங்களுக்கு முன்னர் காலமான நிலையில் தற்போது அவரது சகோதரர் காலமானது வடிவேலு குடும்பத்தில் பெரும் அதிர்ச்சியை ஏற்படுத்தி உள்ளது.

நடிகர் வடிவேலுவின் தாயார் கடந்த ஜனவரி மாதம் காலமான நிலையில் இன்று நடிகர் வடிவேலுவின் உடன் பிறந்த சகோதரர் ஜெகதீஸ்வரன் என்பவர் காலமானார். இது அவரது குடும்பத்திற்கு பெரும் சோகத்தை ஏற்படுத்தியுள்ளது.

55 வயதான ஜெகதீஸ்வரன் கடந்த சில நாட்களாக கல்லீரல் செயலிழப்பு காரணமாக மருத்துவமனையில் சிகிச்சை பெற்று வந்ததாகவும் சிகிச்சையின் பலன் இன்றி இன்று காலமானதாகவும் தெரிகிறது.

வடிவேலு சகோதரர் ஜெகதீஸ்வரன் சிம்பு நடித்த ’காதல் அழிவதில்லை’ உள்பட ஒரு சில படங்களில் நடித்துள்ளார். பிறகு தனிப்பட்ட பிரச்சனை காரணமாக அவர் சினிமாவில் நடிக்கவில்லை. இப்போது ஜவுளி கடை நடத்தி வந்த நிலையில் திடீரென உடல்நலக்குறைவு காரணமாக அவர் காலமானார்.

சகோதரர் மறைவால் வடிவேலு மற்றும் அவரது குடும்பத்தினர் பெரும் சோகத்தில் உள்ளனர். இந்த நிலையில் திரையுலகினர் வடிவேலு குடும்பத்தினருக்கு தங்களது இரங்கலையும் ஆறுதலையும் தெரிவித்து வருகின்றனர்.